Australia vs India Sydney Test: भारत आणि ऑस्ट्रेलिया संघात सिडनी क्रिकेट ग्राऊंडवर सुरू असलेल्या पाचव्या कसोटी सामन्यातील रविवारी तिसरा दिवस आहे. या दिवशी भारतीय संघाने ऑस्ट्रेलियासमोर १६२ धावांचे लक्ष्य ठेवले आहे.

दरम्यान, या सामन्यात जसप्रीत बुमराहच्या अनुपस्थितीत विराट कोहली प्रभारी कर्णधाराची भूमिका निभावत आहे. याचवेळी त्याने ऑस्ट्रेलियाच्या जखमेवरही मीठ चोळले आहे.

झाले असे की ऑस्ट्रेलिया १६२ धावांच्या लक्ष्याचा पाठलाग करण्यासाठी उतरले होते. यावेळी १९ वर्षीय सॅम कॉन्स्टासने उस्मान ख्वाजासोबत सलामीला फलंदाजी करताना आक्रमक खेळ केला. मात्र चौथ्या षटकात कॉन्स्टासला प्रसिद्ध कृष्णाने बाद केले. त्याने १७ चेंडूतच २२ धावा केल्या.

पाठोपाठ ८ व्या षटकात मार्नस लॅबुशेन ६ धावांवर बाद झाला. त्यानंतर स्टीव्ह स्मिथने ख्वाजाला साथ देण्याचा प्रयत्न केला. स्मिथला १० हजार कसोटी धावा पूर्ण करण्यासाठीही ५ धावांची गरज होती. मात्र त्याला ४ धावांवरच प्रसिद्ध कृष्णानेच यशस्वी जैस्वालच्या हातून झेलबाद केले. त्यामुळे ऑस्ट्रेलियाची अवस्था ३ बाद ५८ धावा अशी झाली होती.

याच दरम्यान स्मिथ बाद झाल्यानंतर ११ व्या षटकादरम्यान विराट स्टेडियममधील प्रेक्षकांसोबत जुगलबंदी करताना दिसला. त्याने प्रेक्षकांना प्रसिद्ध सँडपेपर घटनेची आठवण करून दिली. ही घटना ऑस्ट्रेलिया क्रिकेटमधील एक वाईट घटना आहे.

त्याने खिसे रिकामे करूनही दाखवले की त्याच्या खिशात सँडपेपर नाही. तसेच आम्ही अशा गोष्टी करत नसल्याचे त्याने हावभाव करत सांगितले. त्याच्या या कृतीचा व्हिडिओ आणि फोटोही व्हायरल होत आहेत.