கேரள மாநிலம் வயநாடு மாவட்டத்தில் வசித்து வந்தவர் விஜயன் (66). காங்கிரஸ் கட்சியின் பொருளாளராக இருந்தார். அவருக்கு ஜிதேஷ் (30) என்ற மகன் உள்ளார். இருவரும் கடந்த மாதம் 27 ஆம் தேதி மணிச்சேரியில் உள்ள தங்கள் வீட்டில் விஷம் குடித்து தற்கொலை செய்து கொண்டனர். இதற்கிடையில், சுல்தான் பத்தேரி கூட்டுறவு வங்கியில் ஊழியர்களை நியமிப்பதற்காக விஜயன் பலரிடம் இருந்து ரூ.1.5 கோடி பெற்றதாக குற்றம் சாட்டப்பட்டது. இது குறித்து போலீசார் வழக்குப் பதிவு செய்து விசாரணை நடத்தினர். அப்போது, தற்கொலை செய்வதற்கு முன்பு விஜயன் எழுதிய கடிதத்தை கைப்பற்றினர்.

அதில், வங்கி ஊழியர்களை நியமிப்பதற்காக பலரிடம் பணம் பெற்று, அதை காங்கிரஸ் எம்எல்ஏ பாலகிருஷ்ணனிடம் கொடுத்தேன். ஆனால், பணத்தைப் பெற்றுக்கொண்டதாகவும், பின்னர் யாரையும் நியமிக்க முன்வரவில்லை என்றும் அவர் எழுதி இருந்தார். இதன் அடிப்படையில், பாலகிருஷ்ணன் எம்எல்ஏ மீது போலீசார் வழக்குப் பதிவு செய்தனர். மேலும், இதற்கு உடந்தையாக இருந்த காங்கிரஸ் தலைவர் அப்பச்சன் மற்றும் முன்னாள் பொருளாளர் கோபிநாத் ஆகியோர் மீது வழக்குப் பதிவு செய்யப்பட்டது. இதன் காரணமாக, அவர்கள் 3 பேரும் முன்ஜாமீன் கோரி நீதிமன்றத்தில் மனு தாக்கல் செய்தனர்.

இதை விசாரித்த நீதிமன்றம் அவர்கள் 3 பேருக்கும் முன்ஜாமீன் வழங்கியது. இரண்டு நாட்களுக்கு முன்பு, போலீசார் 3 பேரையும் விசாரணைக்கு அழைத்தனர். அதன்படி, போலீசார் அப்பச்சன் மற்றும் கோபிநாத் இருவரையும் விசாரித்தனர். அதன் பிறகு, இருவரும் கைது செய்யப்பட்டு ஜாமீனில் விடுவிக்கப்பட்டனர். அவர்களிடமிருந்து ஆவணங்கள் பறிமுதல் செய்யப்பட்டுள்ளன. இதையடுத்து பாலகிருஷ்ணனும் விசாரிக்கப்படுவார் என்று கூறப்படுகிறது. இந்த விவகாரம் குறித்து விசாரித்து அறிக்கை சமர்ப்பிக்குமாறு மாநில கூட்டுறவுத் துறை, மாவட்ட கூட்டுறவுத் துறை பதிவாளருக்கு உத்தரவிட்டுள்ளது.