वडूज : लष्करात कार्यरत येथील माधवनगर भागातील जवान चंद्रकांत महादेव काळे (वय ४०) यांना राजस्थान येथे कर्तव्यावर असताना काल रात्री नऊ वाजण्याच्या सुमारास हुतात्मा झाले.

जवान काळे हे लष्करात १८ मीडियम रेजिमेंटमध्ये अटलरी डिपार्टमेंटमध्ये नायब सुभेदार या पदावर कार्यरत होते. ते १८ मीडियम मराठा तोफखाना रेजिमेंटच्या राजस्थान येथील महाजन फायरिंग रेंजमध्ये युद्ध अभ्यासाचा सराव घेत होते. त्या वेळी काल रात्री नऊ वाजण्याच्या सुमारास त्यांना वीरगती प्राप्त झाली.

जवान काळे यांनी लष्करात २३ वर्षे सेवा बजावली होती. त्यांना वीरगती प्राप्त झाल्याचे लष्कराकडून आज सकाळी त्यांच्या कुटुंबीयांना कळविण्यात आले. जवान काळे यांना वीरगती प्राप्त झाल्याची माहिती समजताच शहरावर शोककळा पसरली.

जवान काळे यांच्या मागे आई, वडील, पत्नी, एक मुलगा, एक मुलगी, दोन बहिणी, एक बंधू असा परिवार आहे. उद्या (शुक्रवारी) दुपारपर्यंत जवान काळे यांचे पार्थिव येथे आणण्यात येणार आहे. त्यानंतर माधवनगर तडवळे रस्त्यावरील जिल्हा परिषद शाळेनजीक त्यांच्यावर शासकीय इतमामात अंत्यसंस्कार करण्यात येणार आहेत.