आपल्या अभिनयाने प्रेक्षकांना आपलंसं करणारा मराठी सिनेसृष्टीचा सुपरस्टार अंकुश चौधरी याचा आज वाढदिवस आहे. अंकुशने आपल्या अभिनयासोबतच आपल्या लूक्सने चाहत्यांना भुरळ पाडली. त्याने कायमच आपली नाळ मराठी प्रेक्षकांसोबत जोडलेली ठेवली. अशात आज त्याच्या वाढदिवसाला त्याने चाहत्यांना खास गिफ्ट दिलं आहे. त्याच्या आगामी 'महादेव' या चित्रपटाचा टिझर नुकताच प्रदर्शित करण्यात आलाय. जो पाहून चाहते भलतेच खुश झालेत.

यापूर्वी 'महाराष्ट्र शाहीर' या चित्रपटातून प्रेक्षकांच्या भेटीला आलेला. मात्र त्यानंतर चाहते त्याच्या आगामी चित्रपटाची आतुरतेने वाट पाहत होते. आता अखेर एका नव्या कोऱ्या चित्रपटातून अंकुश चाहत्यांच्या भेटीला येणार आहे. २०२४ मध्ये त्याच्या 'महादेव' या चित्रपटाची घोषणा झाली होती. त्यात त्याचा फक्त एक फोटो दाखवण्यात आला होता. आता या त्याच्या वाढदिवशी या चित्रपटाचा टिझर प्रदर्शित करण्यात आलाय.

या टीझरमध्ये अंकुशचा डॅशिंग अवतार पाहायला मिळतोय. तो आपल्या रंगीत अवतारात दिसतोय. अनेक गुंडांना तो धडा शिकवतोय. व्हिडिओच्या सुसरुवातीलाच महादेवांची मूर्ती पाहायला मिळतेय. तर दुसऱ्याच फ्रेममध्ये एका बुक्कीत समोरच्याला गार करणारा अंकुश दिसतोय. शिवाची आराधना करणारा महादेव या टीझरमध्ये पाहायला मिळतोय. शिवशंभुचा हात माथी, भक्त महादेवचा.. संहार करण्या दुर्जनांचा, घेई अवतार रुद्राचा ...'महादेव' लवकरच प्रेक्षकांच्या भेटीला!' असं कॅप्शन देत अंकुशने हा टिझर प्रदर्शित केलाय.

या टीझरला प्रेक्षकांचादेखील भरभरून प्रतिसाद लाभला आहे. नेटकऱ्यांनी या टीझरवर लाइक आणि कौतुकाचा वर्षाव केलाय. या चित्रपटाची रिलीज डेट समोर आली नसली तरी चाहते हा चित्रपट पाहण्यासाठी उत्सुक आहेत. हा चित्रपट आता बॉक्स ऑफिसवर काय जादू दाखवणार पाहणं औसुक्याचं ठरणार आहे