पुणे : स्वारगेट एसटी बसस्थानकात शिवशाही बसमध्ये तरुणीवर लैंगिक अत्याचार प्रकरणातील नराधमाला गुनाट (ता. शिरूर) गावातील नागरिकांनी गुरुवारी मध्यरात्री पकडून पोलिसांच्या ताब्यात दिले. स्वारगेट पोलिसांनी शुक्रवारी सकाळी त्याला अटक केली. आरोपीला पकडण्यात गावकऱ्यांची भूमिका महत्त्वाची ठरली. आरोपीला कठोर शिक्षा व्हावी, यासाठी पोलिस दलाकडून प्रयत्न करण्यात येतील, अशी माहिती पोलिस आयुक्त अमितेश कुमार यांनी शुक्रवारी (ता. २८) दिली.

स्वारगेट एसटी बसस्थानकात शिवशाही बसमध्ये मंगळवारी (ता. २५) पहाटे नराधमाने तरुणीवर लैंगिक अत्याचार केल्याची घटना घडली होती. याबाबत २६ वर्षीय तरुणीने सकाळी नऊ वाजण्याच्या सुमारास फिर्याद दिली. त्यानुसार स्वारगेट पोलिसांनी दत्तात्रेय रामदास गाडे (वय ३१, रा. गुनाट, ता. शिरूर) याच्यावर गुन्हा दाखल केला. पोलिसांकडून बसस्थानकातील २३ सीसीटीव्ही आणि बाहेरील ४८ तास सीसीटीव्ही चित्रीकरण तपासण्यात आले. त्यावरून दीड तासातच आरोपीची ओळख पटली. पोलिस गुनाट गावात दुपारी दोनच्या सुमारास पोचले. परंतु आरोपी हाती लागला नव्हता.

त्यानंतर आरोपीला पकडण्यासाठी पोलिस सह आयुक्त रंजनकुमार शर्मा, गुन्हे शाखेचे अतिरिक्त आयुक्त शैलेश बलकवडे, पोलिस उपायुक्त निखिल पिंगळे, पोलिस उपायुक्त स्मार्तना पाटील यांच्या मार्गदर्शनाखाली गुन्हे शाखेची पथके, परिमंडळ दोन, स्वारगेट, पुणे ग्रामीण आणि मुख्यालय असे सुमारे पाचशे पोलिस अधिकारी, कर्मचारी गावात तीन दिवसांपासून तळ ठोकून होते. आरोपी पळून जाऊ नये, यासाठी उसाच्या शेतीसह बसस्थानक, सार्वजनिक ठिकाणी कोम्बिंग ऑपरेशन राबविण्यात आले. ही पुणे पोलिस दलाची संयुक्त कामगिरी आहे. सुमारे चारशे-पाचशे नागरिकांचे सहकार्य मिळाले. श्वान पथकाने आरोपी उसात लपून बसलेली दोन-तीन ठिकाणे दाखवली. तसेच, थर्मल ड्रोनच्या मदतीने आरोपीचा शोध घेण्यात आला.

गुनाट गावातील नागरिकांनी आरोपीला पकडण्यात महत्त्वाची कामगिरी बजावली. नागरिकांनी आरोपीला गुरुवारी मध्यरात्री एक वाजून दहा मिनिटांनी पकडून पोलिसांच्या ताब्यात दिले. पोलिस आयुक्तांनी गुनाटमधील नागरिकांसह पोलिस पाटील, सरपंच यांचे आभार मानले. तसेच, पोलिसांना मदत करणाऱ्या गावकऱ्यांची भेट घेणार असून, त्यांचा सत्कार करणार असल्याचे सांगितले.

पोलिस आणि गावकरी त्याच्या मागावर असल्याचे आरोपीला समजले. त्याने दोरीने गळफास घेऊन आत्महत्येचा प्रयत्न केला. परंतु दोरी तुटल्यामुळे तो वाचला. प्राथमिक वैद्यकीय तपासणीत अहवालात त्याच्या गळ्यावर व्रण असल्याचे आढळून आले आहे.

या प्रकरणाचा तपास करण्यासाठी विशेष पथक नेमण्यात आले असून, सबळ पुरावे गोळा करण्यात येत आहेत. आरोपीला कठोर शिक्षा व्हावी, यासाठी हा खटला जलद गती न्यायालयात चालविण्यात येणार असून, विशेष सरकारी वकिलाची नियुक्ती करण्यात येणार आहे.

महिलांच्या सुरक्षिततेच्या दृष्टीने पोलिसांकडून सर्व प्रयत्न करण्यात येत आहेत. संबंधित विभागांच्या अधिकाऱ्यांशी समन्वय साधून एसटी बसस्थानक, रेल्वे स्थानक, हॉटस्पॉट, टेकड्यांचा परिसर, निर्जन स्थळांच्या ठिकाणांचा सुरक्षा आढावा घेण्यात येत आहे. ‘कॉप २४’ पोलिसांची गस्त वाढविण्यात येणार असून, क्यूआर कोड मॅपिंग करण्यात येणार आहे. महापालिकेच्या मदतीने पथदिव्यांची संख्या वाढविण्यासह उपाययोजना करण्यात येत आहेत, असे पोलिस आयुक्तांनी सांगितले.

आरोपी दत्तात्रेय गाडे हा तीन दिवसांपासून उसाच्या शेतात लपून बसला होता. त्याला तहान लागल्याने तो गुरुवारी रात्री सव्वादहाच्या सुमारास गावातील बहिरट वस्तीत आला. त्याने एका व्यक्तीच्या घरी पाणी मागितले. त्याने आरोपीला पाणी दिले परंतु लगेचच याबाबत पोलिसांना खबर दिली. ही माहिती देणाऱ्यास पोलिसांकडून एक लाखाचे बक्षीस देण्यात येणार असल्याचे पोलिस आयुक्तांनी सांगितले.

तरुणीने तक्रार दिल्यानंतर स्वारगेट पोलिसांनी बसस्थानकातील सीसीटीव्ही चित्रीकरण तपासले. त्यामधील संशयितावर स्वारगेट पोलिस ठाण्यात २२ जानेवारी २०२४ रोजी मोबाईल चोरीचा गुन्हा दाखल होता. त्या संशयिताचे छायाचित्र पीडित तरुणीला दाखविल्यानंतर आरोपीची ओळख पटली. त्यानंतर पोलिसांनी मोबाईल लोकेशनच्या मदतीने केलेल्या तपासात आरोपी दत्तात्रेय गाडे हाच असल्याचे निष्पन्न झाले. त्याच्यावर २०१९ मध्ये अहिल्यानगर आणि पुणे ग्रामीणमध्ये सहा गुन्हे दाखल आहेत.

आरोपी तीन दिवसांपासून उसाच्या शेतात लपून बसला होता. तो तीन दिवस उपाशीच होता. त्याच्या अंगात त्राण राहिले नव्हते. शेतातून बाहेर पडल्यावर त्याने बहिरट वस्तीत एकाच्या घरी पाणी पिण्यास मागितले. त्यानंतर तो गावातील क्रिकेट मैदानाजवळ मोकळ्या जागेतील कच्च्या रस्त्याने पळून जाण्याच्या प्रयत्नात होता. त्यावेळी गावकऱ्यांनी आरोपीचा पाठलाग करून पकडले.

गुन्हे शाखेकडून आरोपी दत्तात्रेय गाडे याचे वर्षभरातील रेकॉर्ड तपासण्यात आले. तो वर्षभरात कोठे-कोठे गेला, कॉल रेकॉर्ड॒सची माहिती काढण्यात आली. पंढरपूर, उज्जैन, शिर्डी, शनी शिंगणापूर, स्वारगेट बसस्थानक, श्रीगोंदा, दौंड रेल्वे स्थानक अशा देवस्थानांच्या आणि गर्दीच्या ठिकाणी त्याचा अधिक वावर असल्याचे आढळून आले आहे.