48768

मायबोली टिकण्यासाठी मराठी
बोला, वाचा, लिहा ः खान

बांद्यात मराठी भाषा गौरव दिन

सकाळ वृत्तसेवा
बांदा, ता. ३ ः हृदयाला भिडणारी भाषा ही मातृभाषा असते. सर्व भाषांमध्ये मराठी ही परिपूर्ण भाषा आहे. मराठी मायबोली टिकविण्यासाठी ती बोलायला हवी, वाचायला हवी, लिहायला हवी. मराठीचा प्रचार प्रसार करण्यासाठी सर्वांनीच पुढाकार घेणे आवश्यक आहे, असे प्रतिपादन ज्येष्ठ नागरिक संघाचे अध्यक्ष अन्वर खान यांनी येथे केले.
येथील नट वाचनालयात आयोजित मराठी भाषा गौरव दिन कार्यक्रमात श्री. खान बोलत होते. व्यासपीठावर वाचनालयाचे अध्यक्ष एस. आर. सावंत, उपाध्यक्ष नीलेश मोरजकर, कार्यवाह राकेश केसरकर, अनंत भाटे, सहकार्यवाह हेमंत मोर्ये, संचालक प्रकाश पाणदरे, बांदा केंद्रशाळेचे मुख्याध्यापक शांताराम असनकर, महिला संचालिका स्वप्नीता सावंत आदी उपस्थित होते. यावेळी अनंत भाटे, शांताराम असनकर यांनी मनोगत व्यक्त केले. यावेळी विद्यार्थी नैतिक मोरजकर, दुर्वा नाटेकर, ज्येष्ठ महिला अर्चना सावंत, शिक्षिका दीक्षा नाईक, सुनील नातू यांच्यासह विद्यार्थ्यांनी ‘माझ्या आठवणीतील कविता’ सादर केल्या.
यावेळी राजेश्वरी बांदेकर, ग्रंथपाल सुस्मिता नाईक, सहाय्यक ग्रंथपाल सुनील नातू, अमिता परब आदी उपस्थित होते. यावेळी वाचनालयात ग्रंथप्रदर्शन आयोजित केले होते. राकेश केसरकर यांनी सूत्रसंचालन करून आभार मानले.