Maharashtra Budget : मुंबईला ग्रोथ हब म्हणून विकसित करण्याचा निर्णय

मुंबईला ग्रोथ हब म्हणून विकसीत करण्याचा निर्णय, बीकेसी, वडाळा, गोरेगाव, खारघर, बोईसर, विरार या ठिकाणी आंतरराष्ट्रीय दर्जाची व्यापारी केंद्र तयार केली जाणार आहेत. मुंबईची अर्थव्यवस्था १४० बिलियन डॉलरवरून २०३० पर्यंत ३०० बिलियन डॉलर तर २०४७ पर्यंत १.५ ट्रिलियन डॉलरपर्यंत नेण्याचं उद्दिष्ट आहे.

राज्यात ३७ विशेष आर्थिक क्षेत्रं विकसित करणार : अजित पवार

नवे कामगार नियम होणार आहेत. राज्यात ३७ विशेष आर्थिक क्षेत्रे विकसित केली जाणार आहेत.

Maharashtra Budget : राज्यात रोजगार निर्मिती होतेय, अजित पवार

राज्यात मोठ्या प्रमाणात गुंतवणूक होत आहे. राज्य औद्योगिक विकासात सदैव अग्रेसर राहील. राज्यात मोठ्या प्रमाणात रोजगार निर्मिती होत असल्याचं अजित पवार म्हणाले.

Ajit Pawar : विकासाची केली कामे म्हणून आम्ही पुन्हा आलो, पुन्हा आलो : अजित पवार

अर्थसंकल्पाच्या वाचनाला सुरुवात करण्याआधी अजित पवार यांनी आम्ही विकासाची कामे केली म्हणून पुन्हा आलो असं म्हटलं. यासाठी त्यांनी कवितेचा आधार घेतला.

ते म्हणाले की,

लाडक्या बहिणी मिळाल्या धन्य झालो,

कोटी बारा प्रियजनांना मान्य झालो

विकासाची केली कामे

म्हणून आम्ही पुन्हा आलो पुन्हा आलो

Maharashtra Budget 2025 : अर्थसंकल्पाच्या वाचनाला सुरुवात

अर्थमंत्री अजित पवार विधानसभेत अर्थसंकल्प मांडत आहेत. त्यांनी अर्थसंकल्पाच्या वाचनाला सुरुवात केलीय. केंद्रीय अर्थसंकल्पातील तरतुदीमुळे राज्यातील विकासाला बळ मिळणार आहे. भरीव तरतुदीसाठी पंतप्रधान नरेंद्र मोदींचे आभार मानतो असं अजित पवार म्हणाले.

Maharashtra Budget : 'अर्थसंकल्प महायुतीचा, महाराष्ट्राच्या सर्वांगीण प्रगतीचा', अजित पवारांची पोस्ट

राज्याचा अर्थसंकल्प आज सादर करण्याआधी अर्थमंत्री अजित पवार यांनी सोशल मीडियावर 'अर्थसंकल्प महायुतीचा, महाराष्ट्राच्या सर्वांगीण प्रगतीचा' असं म्हणत एक फोटो पोस्ट केलाय. अजित पवार विधानसभेत पोहोचले असून राज्यमंत्री आणि अधिकाऱ्यांसोबत बैठकीनंतर ते अर्थसंकल्प सादर करणार आहेत.

Budget : अर्थसंकल्प सादर करण्याआधी अजित पवारांची राज्यमंत्र्यांसह अधिकाऱ्यांसोबत बैठक

अर्थसंकल्प सादर करण्याआधी अजित पवार यांनी राज्यमंत्री, वित्त व नियोजन विभागाचे अधिकारी यांच्यासोबत बैठक घेतली. अर्थसंकल्पाच्या संदर्भात अंतिम चर्चा या बैठकीत झाली.

अर्थसंकल्प थोड्याच वेळात सादर होणार; अजित पवार विधानभवनाबाहेर दाखल

राज्याचा अर्थसंकल्प अजित पवार आजा सादर करणार आहेत. अर्थसंकल्प घेऊन अजित पवार विधानभवनाबाहेर दाखल झाले आहेत.

Maharashtra Budget 2025 : राज्याचा महसूल वाढवण्यासाठी सरकार प्रयत्न करण्याची शक्यता

राज्य उत्पादन शुल्क, मोटार वाहन विभाग, नोंदणी आणि मुद्रांक शुल्क अंतर्गत विविध कर आणि करेतर महसूल वाढवण्यासाठी सरकार प्रयत्न करण्याची शक्यता आहे.

Maharashtra Budget Live : नमो शेतकरी सन्मान निधीत वाढीची शक्यता, अजितदादा गूडन्यूज देणार?

महाराष्ट्र सरकारने नमो शेतकरी महासन्मान निधी योजना सुरू केलीय. या योजनेतून आतापर्यंत पाच हप्ते देण्यात आलेत. या निधीच्या योजनेत ३ हजार रुपयांची वाढ करणार असल्याचं मुख्यमंत्री देवेंद्र फडणवीस यांनी जाहीर केलं होतं. उपमुख्यमंत्री अजित पवार आजच्या अर्थसंकल्पात नमो शेतकरी महासन्मान निधीची रक्कम वाढवून देणार का याकडे शेतकऱ्यांचं लक्ष लागून राहिलं आहे.

Budget 2025 : एक ट्रिलियन डॉलरची अर्थव्यवस्था कशी बनणार? राज्य सरकार कठोर निर्णय घेणार

सरकारच्या एक ट्रिलियन डॉलरची अर्थव्यवस्था बनण्याच्या महत्त्वकांक्षी घोषणेच्या पूर्ततेसाठी आर्थिक विकासाला आणखी चालना द्यावी लागणार आहे. त्यासाठी काही कठोर निर्णय आगामी अर्थसंकल्पातून जाहीर होण्याची शक्यता आहे.

Maharashtra Budget : अजितदादा विधानसभेत तर आशिष जैस्वाल विधानपरिषदेत अर्थसंकल्प मांडणार

राज्याचा अर्थसंकल्प दुपारी दोन वाजता सादर केला जाणार आहे. विधानसभेत उपमुख्यमंत्री तथा अर्थमंत्री अजित पवार हे अर्थसंकल्प सादर करतील. तर विधानसभेत राज्यमंत्री आशिष जैस्वाल अर्थसंकल्प मांडणार आहेत.

Maharashtra Budget Live : स्थानिक स्वराज्य संस्थांच्या निवडणुकांच्या पार्श्वभूमीवर काय घोषणा?

राज्याच्या तिजोरीवर आर्थिक भार वाढला आहे. त्यामुळे कमी खर्चाच्या आणि परिणामकारक अशा योजनांची चाचपणी सरकार करतंय. स्थानिक स्वराज्य संस्थांच्या निवडणुकांच्या पार्श्वभूमीवर सरकार काय घोषणा करणार हे पाहणं महत्त्वाचं ठरणार आहे.

CM Devendra Fadnavis : कोणत्याही कल्याणकारी योजना बंद करणार नाही; मुख्यमंत्र्यांची ग्वाही

मुख्यमंत्री देवेंद्र फडणवीस यांनी अर्थसंकल्पाबाबत प्रतिक्रिया देताना सांगितलं की, अतिशय चांगला आणि संतुलित अर्थसंकल्प मांडण्याचा आमचा प्रयत्न आहे. आर्थिक शिस्त पाळताना भांडवली खर्चावर परिणाम होणार नाही याची काळजी घेत आहोत. हे करत असताना कोणत्याही कल्याणकारी योजना बंद करणार नाही असंही मुख्यमंत्र्यांनी म्हटलंय.

Maharashtra Budget : राज्यात आतापर्यंत कुणी सर्वाधिक अर्थसंकल्प सादर केलाय?

राज्यात आतापर्यंत शेषराव वानखेडे यांनी सर्वाधिक १३ वेळा अर्थसंकल्प सादर केला आहे. त्यांच्यानंतर अजित पवार याबाबतीत दुसऱ्या क्रमांकावर आहेत. अजित पवार अकराव्यांदा अर्थसंकल्प सादर करणार आहेत. अजित पवारांनंतर जंयत पाटील यांचा क्रमांक लागतो. जयंत पाटील यांनी १० वेळा अर्थसंकल्प सादर केलाय. त्यांच्यानंतर सुशील कुमार शिंदे यांनी ९ वेळा अर्थमंत्री म्हणून अर्थसंकल्प मांडलाय.

Maharashtra Budget Live Updates : पुरवणी मागण्यांमुळे वित्तीय तूट आणखी वाढणार

पावसाळी अधिवेशनातील ९४ हजार ६१० कोटींच्या पुरवणी मागण्या, चालू अधिवेशनातील ६४०० कोटींच्या पुरवणी मागण्या यामुळे वित्तीय तूट आणखी वाढण्याची शक्यता आहे.

Maharashtra Budget : राज्यावर कर्जाचा बोजा वाढतोय

वाढत्या कर्जाची राज्याला चिंता असून याआधी नीती आयोगाकडून राज्य सरकारला सावधही केलंय. २०१८ पासून २०२३ पर्यंत राज्य सरकारच्या कर्जात सरासरी ९.९२ टक्के दराने वाढ झालीय.

Maharashtra Vidhan sabha Budget 2025 LIVE राज्य सरकारची वित्तीय तूट अपेक्षेपेक्षा दुप्पट

राज्य सरकारने गेल्या वर्षी जुलै मध्ये सुरू केलेल्या कल्याणकारी आणि विकास योजनांसाठी ९६ हजार कोटींचा निधी दिला. यामुळे २०२४-२५ अखेरीस वित्तीय तूट ही अपेक्षित तुटीपेक्षा दुप्पट होण्याची शक्यता आहे. १.१० लाख कोटी रुपयांवरून २.३० लाख कोटी रुपयांपर्यंत तूट पोहोचण्याचा अंदाज आहे.

Maharashtra Budget session 2025 LIVE : अजित पवार अकराव्यांदा सादर करणार अर्थसंकल्प

राज्याचे अर्थमंत्री अजित पवार आज विधानसभेत २०२५-२६ साठीचा अर्थसंकल्प सादर करणार आहेत. महायुती सरकारचा हा पहिलाच अर्थसंकल्प आहे तर अजित पवार यांचा हा अकरावा अर्थसंकल्प असणार आहे. विधानसभा निवडणुकीत महायुतीने अनेक आश्वासनं दिली होती. त्या योजनांमुळे राज्याच्या तिजोरीवर आर्थिक भार पडला आहे. वाढता खर्च, महसुली तूट, वाढते कर्ज आणि प्रशासकीय खर्चावर नियंत्रण याचं आव्हान अर्थमंत्री अजित पवार यांच्यासमोर असणार आहे. वित्तीय तूट १.१० लाख कोटींवरून २.३० लाख कोटींवर पोहोचलीय. तर राज्यावर असलेला कर्जाचा बोजा ७ लाख ८२ हजार ९९१ कोटी रुपयांपर्यंत गेलाय. अर्थसंकल्पात लाडकी बहीण योजनेत लाभार्थी महिलांना मिळणारा १५०० रुपयांचा हफ्ता वाढवणार का याकडे सर्वांचं लक्ष आहे. विधानसभा निवडणुकीवेळी महायुतीने १५०० रुपयांवरून ही रक्कम २१०० रुपये करू अशी घोषणा केली होती.