கேரளாவின் கண்ணூர் மாவட்டத்தில், தமிழ்நாட்டைச் சேர்ந்த ஒரு தம்பதியின் 4 மாத குழந்தை திடீரென காணாமல் போய்விட்டு, பின்னர் வீட்டின் அருகிலுள்ள கிணற்றில் மரணமடைந்த நிலையில் மீட்கப்பட்ட சம்பவம் அதிர்ச்சியை ஏற்படுத்தியுள்ளது. வளப்பட்டணம் காவல்நிலையத்தில் அளிக்கப்பட்ட புகாரின்படி, வேலைக்காக கேரளா குடிபெயர்ந்த இந்த தம்பதி, தங்களது வீட்டில் இரவு 9.30 மணியளவில் தூங்கச் சென்றனர். இரவு 11 மணியளவில், குழந்தையின் தாய் திடீரென விழித்து குழந்தை காணவில்லை எனக் கவலைப்பட்டு கணவரிடம் தெரிவித்தார். அவரது கதறல்களை கேட்ட பிற பக்கத்து வீட்டுக்காரர்கள் உதவியுடன் குழந்தையை தேடி, சிறிது நேரத்திற்குப் பிறகு, அருகிலுள்ள கிணற்றில் குழந்தையின் உடல் மிதப்பதை கண்டனர்.

இந்த சம்பவம் குறித்து போலீசார் வழக்குப் பதிவு செய்து, சந்தேகத்திற்குரிய மரண விசாரணை தொடங்கியுள்ளனர். குழந்தையின் உடல் கண்ணூர் மாவட்ட மருத்துவமனைக்கு பிரேத பரிசோதனைக்காக அனுப்பப்பட்டுள்ளது. குழந்தை எப்படி கிணற்றில் விழுந்தது? அது ஒரு விபத்தா அல்லது வேறு ஏதாவது காரணமா? என்பதைக் கண்டறிய, பெற்றோரை போலீசார் விசாரித்து வருகின்றனர். மேலும், குடும்பத்தினர், அண்டை வீட்டு மக்கள், மற்றும் மற்ற குடியிருப்பாளர்களிடம் இருந்து தகவல் சேகரிக்கும் பணியில் போலீசார் ஈடுபட்டுள்ளனர். இதேபோல், ஹைதராபாத் நகரில் நான்கு வயது சிறுவன் அடுக்குமாடி குடியிருப்பில் லிப்ட் விபத்தில் சிக்கி உயிரிழந்த சம்பவமும் பெரும் அதிர்ச்சியை ஏற்படுத்தியுள்ளது.