Kunal Kamra Update : शिवसैनिकांना न्यायालयीन कोठडी

स्टँडअप कॉमेडियन कुणाल कामरा याच्या उपमुख्यमंत्री एकनाथ शिंदे यांच्याविषयीच्या विधानावर वाद निर्माण झाला आहे. त्याचा कार्यक्रम झालेल्या मुंबईतील खार भागातील हॉटेलमध्ये शिवसैनिकांनी रविवारी रात्री तोडफोड केली. याप्रकरणी शिवसैनिकांवर गुन्हा दाखल करण्यात आला. आज राहुल कनाल यांच्यासह काही शिवसैनिकांना अटक करून न्यायालयात हजर करण्यात आले. त्यांना कोर्टाने न्यायालयीन कोठडी सुनावली आहे.

BMC Roads News : मंत्रालयात बैठक

मुंबईतील रस्त्यांच्या कामात भ्रष्टाचार झाल्याचा आरोप विरोधकांसह सत्ताधारी आमदारही करत आहे. यापार्श्वभूमीवर विधानसभेच्या अध्यक्ष राहुल नार्वेकर यांच्या दालनामध्ये उपमुख्यमंत्री एकनाथ शिंदे यांंच्या उपस्थितीत आज महत्वाची बैठक होणार आहे. या बैठकीत आदित्य ठाकरेंसह मुंबईतील सर्व आमदार सहभागी होणार आहे. रस्त्यांच्या कामांबाबत महत्वाचा निर्णय होण्याची शक्यता आहे.

कुणाल कामराने सत्य मांडले... शिंदे गद्दारचं! उद्धव ठाकरे

कुणाल कामरा याने सत्य मांडले आहे. सत्य बोलणे हे अभिव्यक्ती स्वातंत्र्यावर हल्ला होऊ शकत नाही. शिंदे गद्दार आहेत हे आम्ही उघड उघडपणे म्हणत आहोत, अशा भाषेत शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांनी कुणाल कामराचे समर्थन केले.

मोठी बातमी : विधानसभा उपाध्यक्षपदाची निवडणूक जाहीर

विधानसभा उपाध्यक्षपदाची निवडणूक जाहीर झाली आहे. येत्या 26 मार्च रोजी उपाध्यक्षांच्या निवडीसाठी निवडणूक होणार असल्याची घोषणा अध्यक्ष राहुल नार्वेकर यांनी विधानसभेत केली.

कुणाल कामराचा आबरा का डाबरा करणार

कुणाल कामरा याने राज्याचे उपमुख्यमंत्री एकनाथ शिंदे यांच्यावर अश्लाघ्य भाषेत वक्तव्य केलं असून या वक्तव्याचा पुणे शहराच्या वतीने तीव्र निषेध करतो. उपमुख्यमंत्री एकनाथ शिंदे यांच्यावर अश्लाघ्य भाषेत टीका करणाऱ्या कामराचा आबारा का डाबरा करण्याचा कडक इशारा शिवसेनेचे शहरप्रमुख प्रमोद नाना भानगिरे यांनी दिला आहे.

कुणाल कामराच्या स्टुडिओची तोडफोड; 40 शिवसैनिकांना दणका

मुंबईतील खार परिसरात असलेल्या 'हॅबिटॅट स्टुडिओ'ची तोडफोड केल्याप्रकरणी सुमारे 40 शिवसेनेच्या कार्यकर्त्यांविरुद्ध गुन्हा दाखल करण्यात आला आहे.

Mahadev Munde murder case:महादेव मुंडे खून प्रकरणाचा तपासअधिकारी बदलला

परळीतील व्यापारी महादेव मुंडे खून प्रकरणाचा तपास गेवराई पोलीस उपाधीक्षकांकडे वर्ग करण्यात आला आहे. गेवराई चे उपाधीक्षक एन.बी. राजगुरू हे आता महादेव मुंडे खून प्रकरणाचा तपास करणार आहेत. यापूर्वी अंबाजोगाईचे उपाधीक्षक अनिल चोरमले हे या प्रकरणाचा तपास करीत होते.

Kunal Kamra live:कुणाल कामरा यांना फडणवीसांनी दिला इशारा

कुणाल कामरा यांच्या गाण्यावर मुख्यमंत्री देवेंद्र फडणवीस यांनी नाराजी व्यक्त करीत कायदेशीर कारवाईचा इशारा दिला आहे. फडणवीस म्हणाले, "कॉमेडी करण्याचा अधिकार आहे. आमच्यावरही व्यंग करा यात काही वाईट वाटणार नाही. मात्र मुद्दाम एवढ्या मोठ्या नेत्यांना बदनाम करण्याचं कोणी काम करत असेल तर ते सहन केलं जाणार नाही. त्यांच्याविरोधात कायदेशीर कारवाई केली जाईल,"

Kunal Kamra live: कुणाल कामरा यांना अजितदादांचा सल्ला

उपमुख्यमंत्री अजित पवार यांनी कुणाल कामरा यांच्या गाण्यावर प्रतिक्रिया व्यक्त केली आहे.कायदा आणि सुव्यवस्था राखण्याचं नवं काम निर्माण होणार नाही याचीही खबरदारी प्रत्येक जबाबदार नागरिकानं घेतली पाहिजे', असं अजित पवार म्हणाले. 'कायदा, संविधान, मर्यादेच्या पुढे कोणीच जाऊ नये. वैचारिक वक्तव्य असू शकतात. विचारधारा वेगळी असू शकते. पण ते मांडताना आणि चर्चा होताना त्यातून नवा प्रश्न निर्माण होणार नाहीत याची काळजी प्रत्येकाने घेतली पाहिजे

Kunal Kamra News :कोण कद्दार आहे, हे सगळ्यांना माहीत आहे

काँमेडियन कुणाल कामरा यांनी माफी मागितली पाहिजे, असे मुख्यमत्री देवेंद्र फडणवीस यांनी विधिमंडळ परिसरात सांगितले. कोण कद्दार आहे, हे सगळ्यांना माहीत आहे, असे फडणवीस म्हणाले.

Nagpur Violence Live: फहीमचे घर महापालिकेनं पाडलं

नागपूर हिंसाचार प्रकरणातील मुख्य आरोपी फहीम खान यांच्या घरावर नागपूर महापालिकेने बुलडोजर चालवला आहे. संजय पार्क येथील त्यांचे घर अतिक्रमणाता असल्याने ही कारवाई करण्यात आली आहे.

Aamir khan met with santosh deshmukh Family : आमिर खानने घेतली संतोष देशमुख यांच्या मुलांची भेट

बीडमधील मस्साजोग गावचे सरपंच संतोष देशमुख यांची निर्घृण हत्या करण्यात आली. त्यांची हत्या करणाऱ्या आरोपींना कठोर शिक्षा व्हावी अशी मागणी राज्यातील जनता करत आहे. तर या मागणीचा पाठपुरावा त्यांचे बंधू धनंजय देशमुख करत आहेत. यादरम्यान आमिर खानने संतोष देशमुख यांच्या मुलाची भेट घेतली. तसेच दोन्ही मुलांचे सांत्वन केले.

Prashant Koratkar News : कोरटकरच्या अटकपूर्व जामीन अर्जावर हायकोर्टात आज सुनावणी

प्रशांत कोरटकरने छत्रपती शिवाजी महाराज आणि छत्रपती संभाजी महाराज यांच्याबद्दल वादग्रस्त वक्तव्य केलं होतं. तसेच कोल्हापूर येथील इतिहास संशोधक इंद्रजित सावंत यांना जीवे मारण्याची धमकी दिली होती. याप्रकरणी त्याला कोणत्याही क्षणी अटक होण्याची शक्यता आहे. तर अटक टाळण्यासाठी कोरटकरने मुंबई उच्च न्यायालयात धाव घेतली असून आज जामीन अर्जावर हायकोर्टात सुनावणी होणार आहे. कोल्हापूर सत्र न्यायालयानं अटकपूर्व जामीन फेटाळला होता.

Nagpur Violence News : नागपूरमधील सर्व भागातून संचारबंदी मागे

नागपूरमध्ये हिंसाचारानंतर संचारबंदी लागू करण्यात आली होती. ही संचारबंदी काल दुपारी तीन वाजल्यापासून पूर्णपणे उठवण्यात आली आहे. यामुळे महाल, शिवाजी चौक, चिटणीस पार्क चौक, भालदारपुरा, हंसापुरी या सर्व भागांमध्ये जनजीवन पूर्वपदावर येताना दिसत आहे.

Aaditya Thackeray News : भ्याड टोळीचा हल्ला, मुख्यमंत्र्यांनाही मिंधेंनी कमजोर केलं; कुणाल कामरा प्रकरणावर आदित्य ठाकरेंकडून शिंदेंवर हल्लाबोल

उपमुख्यमंत्री एकनाथ शिंदे यांच्यावर विनोदी कलाकार कुणाल कामरा याने वादग्रस्त गाणे केल्याने नवा वाद सुरू झाला असून महाराष्ट्रात खळबळ उडाली आहे. याप्रकरणी कमरावर गुन्हा दाखल झाला असून शिवसेनेनं त्याच्या स्टुडिओची तोडफोड केली आहे. यावरून आदित्य ठाकरे यांनी देखील हल्लाबोल करताना, कामरा यांचे विधान 100 टक्के खरे असल्याचे म्हटलं आहे. यामुळे आता हा वाद आणखी चिघळण्याची शक्यता आहे.

Kunal Kamra News : कुणाल कामराप्रकरणी संजय राऊतांचं ट्विट

स्टँडअप कॉमेडियन कुणाल कामरा हा याने उपमुख्यमंत्री एकनाथ शिंदेंवर केलेल्या व्यंगात्मक गाण्यामुळे आता नवा वाद सुरू झाला आहे. याप्रकरणानंतर शिंदेंची शिवसेना आक्रमक झाली असून त्यांनी कुणाल कामराचा स्टुड्ओची तोडफोड केली आहे. यानंतर आता शिवसेना उद्धव बाळासाहेब ठाकरे पक्षाचे खासदार संजय राऊत यांनी यावरून टीकास्त्र सोडलं आहे. त्यांनी याबाबत X वर एक पोस्ट करत सत्ताधाऱ्यांवर निशाणा साधला आहे. तर देवेंद्रजी... तुम्ही एक कमकुवत गृहमंत्री आहात, असा टोला लगावला आहे.

Prashant Koratkar News : कोरटकरवर देशद्रोहाचा गुन्हा दाखल करा, मुधोजी राजे भोसलेंची मागणी

प्रशांत कोरटकरने छत्रपती शिवाजी महाराज आणि छत्रपती संभाजी महाराज यांच्याबद्दल वादग्रस्त वक्तव्य केलं होतं. तसेच कोल्हापूर येथील इतिहास संशोधक इंद्रजित सावंत यांना जीवे मारण्याची धमकी दिली होती. याप्रकरणी कोरटकरवर गुन्हा दाखल असून तो अद्याप फरार आहे. यादरम्यान कोरटकरवर देशद्रोहाचा गुन्हा दाखल करण्याची मागणी नागपूरचे राजे मुधोजी भोसले यांनी केली आहे.

Kunal Kamra News : कुणाल कामरा प्रकरणात शिवसैनिकांवर गुन्हा दाखल

एकनाथ शिंदे संदर्भात बदनामीकारक गाणं गायल्यानंतर आक्रमक झालेल्या शिवसैनिकांनी स्टुडिओची तोडफोड केली. आता या प्रकरणी खार पोलिसांकडून तोडफोड करणाऱ्या शिवसैनिकांवर गुन्हा दाखल करण्यात आला आहे. याप्रकरणी कुणाल सरमळकर, राहुल कनाल सह शिवसेना कार्यकर्ता पदाधिकाऱ्यांवर गुन्हा दाखल करण्यात आला आहे.

Nagpur Riots News : नागपूर हिंसाचारप्रकरण: न्यायालयीन चौकशी करा, ठाकरे गटाची मागणी

नागपूर हिंसाचार प्रकरणाची न्यायालयीन चौकशी करण्यात यावी, अशी मागणी उद्धव बाळासाहेब ठाकरे पक्षाने केली आहे. याबाबच नागपूरचे जिल्हाप्रमुख उत्तम कापसे यांनी निवेदन दिले असून हिंसाचारात अनेक निर्दोष लोकांची पोलीसांनी धरपकड करत त्यांना अटक केली आहे. त्यामुळे दोषी सोडून निर्दोषांवर कारवाई होऊ नये, सत्यता तपासली जावी. म्हणून न्यायालयीन चौकशी व्हावी अशी मागणी करण्यात आली आहे.

Nagpur Violence News : फहीम खानच्या घरावर बुलडोझर? सरकारनं धाडली कुटुंबीयांना नोटीस

नागपुरात हिंसाचार प्रकरणी फहीम खान मुख्य आरोपी असून त्याच्यावर देशद्राहाचा गुन्हा दाखल करण्यात आला आहे. आता त्याच्या घरावर सरकार बुलडोझर चालवणार? असल्याच्या चर्चा सुरू झाल्या आहेत. तर याकारवाईबाबत त्याच्या कुटुंबीयांना नोटीस देखील पाठवण्यात आली आहे.

Disha Salian case News : दिशा सालियनच्या वडिलांचा जबाब आज (ता.24) पोलीस नोंदवण्याची शक्यता

दिशा सालियन प्रकरणात तिच्या वडिलांनी याचिका दाखल केली आहे. त्यामुळे पाच वर्षांनंतर पुन्हा एकदा हे प्रकरण चर्चेत आलं असून दिशाचा बलात्कार करून हत्या झाल्याचा दावा त्यांनी केला आहे. या प्रकरणात शिवसेना ठाकरे गटाचे नेते आदित्य ठाकरे यांच्यावर देखील आरोप करण्यात आला आहेत. यामुळे सध्या राजकीय वर्तुळात आरोप-प्रत्यारोपाचं राजकारण रंगले आहे. दरम्यान आज (ता.24) या प्रकरणात मालवणी पोलीस दिशाच्या वडिलांचा जबाब नोंदवण्याची शक्यता आहे.