"कोल्हापुरात ‘आयटीहब’ उभारण्याचा निर्णय घेण्यात आला. यातून युवकांना स्थानिक पातळीवर रोजगार उपलब्ध होणार आहे.’’

कोल्हापूर : कोल्हापुरातील शेंडापार्क येथे ‘आयटीहब’ उभारण्यासाठी कृषी विद्यापीठाची (Agricultural University) ३४ हेक्टर जागा हस्तांतरित करण्यात येणार आहे. त्यामुळे कृषी विद्यापीठाला शेती, शिक्षण, संशोधन यासाठी ६० ते १०० हेक्टर पर्यायी जागा लागेल. त्या जागेचा येत्या दहा दिवसांत शोध घ्या, असे निर्देश उपमुख्यमंत्री (Ajit Pawar) यांनी मुंबईत आयोजित बैठकीत दिले. या निर्देशामुळे कोल्हापुरातील शेंडापार्क येथे ‘आयटीहब’ निर्माण होण्याचा मार्ग मोकळा झाला आहे.

शहरातील ‘आयटीहब’साठी शेंडापार्क (Shendapark) येथील कृषी विद्यापीठाची ३४ हेक्टर जागा हस्तांतरित करण्याचा निर्णय शासनाने घेतला आहे. त्या जागेच्या बदल्यात कृषी विद्यापीठाला जिल्ह्यातील अन्य ठिकाणची ६० ते १०० हेक्टर एकत्रित पर्यायी जागा देण्यात येणार आहे. ही जागा निश्चित करण्यासंदर्भात श्री. पवार यांच्या अध्यक्षतेखाली मुंबईतील सह्याद्री शासकीय अतिथीगृहात बैठक झाली.

बैठकीला कृषिमंत्री माणिकराव कोकाटे, कोल्हापूरचे पालकमंत्री प्रकाश आबिटकर, वैद्यकीय शिक्षणमंत्री हसन मुश्रीफ, आमदार अमल महाडिक, कोल्हापूरचे जिल्हाधिकारी अमोल येडगे, महात्मा फुले कृषी विद्यापीठ राहुरीचे कुलसचिव डॉ. नितीन दानवले, अपर जिल्हाधिकारी संजय शिंदे, निवासी उपजिल्हाधिकारी संजय तेली ऑनलाईनद्वारे, तर नियोजन विभागाचे अपर मुख्य सचिव राजगोपाल देवरा, वित्त विभागाचे अपर मुख्य सचिव ओ. पी. गुप्ता, उद्योग सचिव डॉ. पी. अनबलगन, उपमुख्यमंत्र्यांचे सचिव डॉ. राजेश देशमुख, पुण्याचे विभागीय आयुक्त डॉ. चंद्रकांत पुलकुंडवार, एमआयडीसीचे मुख्य कार्यकारी अधिकारी पी. वेलारासू, उद्योग विभागाचे विकास आयुक्त दीपेंद्रसिंह कुशवाह आदी उपस्थित होते.

पवार म्हणाले, ‘‘राज्याच्या विकासासाठी कृषी आणि उद्योग या दोन्ही क्षेत्रांचा समतोल विकास महत्त्वाचा आहे. शेती संशोधनाच्या क्षेत्रात विद्यापीठांनी नेहमीच महत्त्वाची भूमिका बजावली आहे. त्यांना आवश्यक सुविधा तसेच शेती, शिक्षण, संशोधन, विस्तार कार्यक्रमासाठी पुरेशी, अनुकूल जागा उपलब्ध करून देण्याची जबाबदारी शासनाची असून, शासन ती पार पाडेल. राज्याने काळाची गरज ओळखून उद्योगस्नेही धोरण स्वीकारले आहे. त्यातून उद्योगक्षेत्राला प्रोत्साहन देण्यात येत आहे. यातून राज्याचा आर्थिक विकास आणि रोजगाराची संधी उपलब्ध करण्याची उद्दिष्टे साध्य होणार आहेत. त्यातूनच कोल्हापुरात ‘आयटीहब’ उभारण्याचा निर्णय घेण्यात आला. यातून युवकांना स्थानिक पातळीवर रोजगार उपलब्ध होणार आहे.’’

शेंडापार्क येथील कृषी विद्यापीठाची जागा पूर्वी शहराबाहेर होती, ती आता शहराच्या मध्यवर्ती भागात आली आहे. ‘आयटीहब’सारख्या उद्योगासाठी शहरातील जागा आवश्यक असते. कृषी संशोधनासाठी शहराबाहेरील जागाही उपयोगात आणता येईल, त्यामुळे ‘आयटीहब’साठी शेंडापार्कच्या जागेची निवड करण्यात आल्याचे श्री. पवार म्हणाले. कोल्हापूरच्या जिल्हाधिकाऱ्यांनी कृषी विद्यापीठाच्या मान्यतेने येत्या दहा दिवसांत पर्यायी जागा अंतिम करावी. त्या जागेच्या हस्तांतरणास मंत्रिमंडळाच्या बैठकीत मान्यता घेण्यात येईल, असेही पवार यांनी सांगितले.

कोल्हापुरातील आयटी पार्कचा प्रश्न मार्गी लावण्यात यश आले, याचा मनस्वी आनंद आहे. कृषी विभागाला द्यायच्या पर्यायी जागेसंदर्भातही लवकरच निर्णय होऊन आयटी पार्कच्या कामाला सुरुवात होईल, याची खात्री आहे.

- अमल महाडिक, आमदार

आयटी पार्कसाठी कृषी विभागाची जागा मिळण्यासाठी पर्यायी जागा म्हणून कागल, पन्हाळा, राधानगरी व हातकणंगले तालुक्यांतील जागांची पाहणी करून या जागांबाबतचा अहवाल शासनाकडे पाठवण्यात येईल, असे जिल्हाधिकारी अमोल येडगे यांनी सांगितले.