இந்தியாவின் பணக்கார கோவில்களில் ஒன்றான திருப்பதி ஏழுமலையான் கோவில் அதிகளவு பக்தர்கள் தரிசனம் செய்யும் கோவில் என்ற பெருமைக்கும் உரியது.

திருப்பதி ஏழுமலையான் கோவிலுக்கு ஆந்திரா, தெலங்கானா உள்ளிட்ட தெலுங்கு மொழி பேசும் மாநிலங்கள் மட்டுமின்றி தமிழ்நாடு, கேரளா, கர்நாடகா, ஒடிசா, உத்தர பிரதேசம் உள்ளிட்ட பல்வேறு மாநிலங்களில் இருந்தும் ஏராளமான பக்தர்கள் திருப்பதி ஏழுமலையான் கோவிலுக்கு வருகை புரிந்த வண்ணம் உள்ளனர். பக்தர்களின் வசதிக்காக பல்வேறு தரிசனங்களை தேவஸ்தான நிர்வாகம் வழங்கி வருகிறது.

இந்நிலையில் திருமலை திருப்பதி தேவஸ்தானங்களில் (TTD) உள்ள சேவைகள் மற்றும் வசதிகளை முழுமையாக மாற்றியமைப்பதை உறுதி செய்யுமாறு முதலமைச்சர் சந்திரபாபு நாயுடு உத்தரவிட்டுள்ளார். தேவஸ்தானத்தின் அனைத்து முடிவுகளும் பக்தர்களின் உணர்வுகளையும் கோயில் புனிதத்தையும் மதிக்க வேண்டும் என்றும் முதல்வர் சந்திரபாபு நாயுடு அறிவுறுத்தினார்.

திருமலை திருப்பதி தேவஸ்தானத்தின் மறு ஆய்வுக் கூட்டத்தில் பங்கேற்ற முதல்வர் சந்திரபாபு நாயுடு, திருமலையில் சிறந்த சேவைகள் வழங்குவது அரசின் நற்பெயரை அதிகரிக்கும் என்றார். மேலும் அடுத்த 50 ஆண்டுகளின் தேவைகளைப் பூர்த்தி செய்யும் வகையில் அதிகரித்து வரும் பக்தர்களின் வருகையைக் கருத்தில் கொண்டு திருமலை கோயில் கட்டமைக்கப்பட வேண்டும் என்றும் முதல்வர் சந்திரபாபு நாயுடு தெரிவித்தார்.

மேலும் திருப்பதி ஏழுமலையான் கோயிலின் முழுமையான மறுசீரமைப்பு அவசியம் என்றும் தேர்தலுக்கு முன்பே தான் இதை உறுதி அளித்திருப்பதாகவும் சந்திரபாபு நாயுடு கூறினார். மேலும் பல மாற்றங்கள் ஏற்கனவே செயல்படுத்தப்பட்டுள்ள என்றும் இருப்பினும் இந்த மாற்றம் 100 சதவீதமாக இருக்க வேண்டும் என்றும் அவர் கூறினார்.

பழைய நடைமுறைகள் அல்லது பணியாளர்கள் தேவையில்லாமல் தொடர இடமளிக்கக்கூடாது என்றும் முதல்வர் சந்திரபாபு நாயுடு திட்டவட்டமாக தெரிவித்தார். மேலும் தேவஸ்தான நிதியை பொறுப்புடன் செலவழிக்க வேண்டும் என்றும், அத்தியாவசிய திட்டங்களுக்கு மட்டுமே செலவிட வேண்டும் என்றும் சந்திரபாபு நாயுடு வலியுறுத்தினார். வளர்ச்சி என்ற போர்வையில் தன்னிச்சையாக செலவிடுவதை எச்சரித்த சந்திரபாபு நாயுடு, கடுமையான நிதி ஒழுக்கத்தை பின்பற்ற வேண்டும் என்றும் அறிவுறுத்தினார்.

மேலும் நாம் அனைவரும் கோயிலின் அறங்காவலர்கள் மட்டுமே என்ற அவர், வெங்கடேஸ்வரரின் காணிக்கைகளில் ஒரு ரூபாயைக் கூட தவறாகப் பயன்படுத்த யாருக்கும் உரிமை இல்லை என்றும் சந்திரபாபு நாயுடு தெரிவித்தார். நிர்வாகத்தின் வெளிப்படைத் தன்மையை உறுதி செய்வதற்காக உள் மற்றும் சிஏஜி தணிக்கைகளையும் ஆந்திர மாநில முதல்வர் சந்திரபாபு நாயுடு வலியுறுத்தினார்.

மேலும் 25,000 பக்தர்களை தங்க வைக்கும் வகையில் அலிபிரியில் ஒரு அடிப்படை முகாம் கட்டுவது என்றும் தொடர்புடைய 60 கோயில்களின் மேம்பாட்டுக்கான மாஸ்டர் பிளான் மற்றும் அமராவதியில் உள்ள ஸ்ரீ பத்மாவதி தாயாரின் கோயில் மற்றும் ஸ்ரீ வெங்கடேஸ்வர கோயில் விரிவாக்கம் உள்ளிட்ட பல முக்கிய உள்கட்டமைப்பு திட்டங்கள் மதிப்பாய்வு செய்யப்பட்டுள்ளது என்றும் சந்திரபாபு நாயுடு தெரிவித்தார்.

TTD-க்குள் 100% நிர்வாக சுத்திகரிப்பு, தேவையற்ற மூத்த நியமனங்கள் நிறுத்தப்படுவதை உறுதிசெய்யவும் அதிகாரிகளுக்கு உத்தரவிட்டார். பக்தர்களுக்கான வாட்ஸ்அப் அடிப்படையிலான சேவை விரைவில் தொடங்கப்படும் என்றும் இதன்மூலம் பக்தர்களுடன் நேரடியாக பேசலாம் என்றும் மேலும் முறைகேடுகளைத் தடுக்க ஆதார்-இணைக்கப்பட்ட சேவைகள் அறிமுகப்படுத்தப்படும் என்றும் சந்திரபாபு நாயுடு தெரிவித்தார்.