ராஷ்டிரிய ஜனதா தளத்தின் தலைவரும் பீகார் மாநிலத்தின் முன்னாள் முதல்வருமான லாலு பிரசாத் யாதவ் கடந்த சில ஆண்டுகளாக உடல்நலக் குறைவால் அவதிப்பட்டு வருகிறார். அதே சமயம் கால்நடை தீவன ஊழல் வழக்கில் சிறை சென்ற அவர், உடல்நிலையை காரணம் காட்டி ஜாமீன் பெற்றார்.

மருத்துவர்கள் அறிவுறுத்தலின் பேரில் நீதிமன்றத்தில் அனுமதி பெற்று சிங்கப்பூரில் அவருக்கு 2022ஆம் ஆண்டு சிறுநீரக மாற்று அறுவை சிகிச்சை மேற்கொள்ளப்பட்டது. அவருடைய இளைய மகள் ரோஹிணி ஆச்சார்யாவின் சிறுநீரகம் அவருக்கு பொருத்தப்பட்டது. நலம் பெற்ற லாலு பிரசாத் யாதவ், அவ்வப்போது உடல்நல பரிசோதனைகளை மேற்கொண்டு வந்தார். லாலு ஆக்டிவ் அரசியலில் இல்லாத நிலையில், ராஷ்டிரிய ஜனதா தளத்தை அவரது மகன் தேஜஸ்வி யாதவ் வழிநடத்தி வருகிறார்.

இந்த நிலையில் லாலு பிரசாத் யாதவ் லாலு பிரசாத் யாதவ் இன்று டெல்லிக்குச் செல்வதற்காக பாட்னா விமான நிலையத்திற்குச் சென்று கொண்டிருந்தபோது உடல்நிலை மோசமடைந்ததால் திடீரென மருத்துவமனையில் அனுமதிக்கப்பட்டார். மாலை 4 மணிக்கு ஏர் இந்தியா விமானத்தில் டெல்லி செல்ல இருந்த நிலையில், பாட்னாவில் உள்ள பராஸ் மருத்துவமனையில் அனுமதிக்கப்பட்டார். ரத்தத்தில் சர்க்கரை அளவு அதிகரித்தன் காரணமாக மருத்துவமனையில் அனுமதிக்கப்பட்டதாக தகவல் வெளியானது.

இந்த நிலையில் பீகார் மருத்துவமனையில் இருந்து டிஸ்சார்ஜ் செய்யப்பட்ட லாலு, மேல் சிகிச்சைக்காக ஏர் ஆம்புலன்ஸ் மூலம் டெல்லி எய்ம்ஸ் மருத்துவமனைக்கு அழைத்துச் செல்லப்பட்டார். இதுதொடர்பாக விளக்கம் அளித்த தேஜஸ்வி யாதவ், “லாலு உடல்நிலை தற்போது நார்மலாக உள்ளது . விரைவில் மேல் சிகிச்சைக்காக டெல்லி எய்ம்ஸ் மருத்துவமனைக்கு அழைத்துச் செல்லப்படுவார். விரைவில், அவர் உடல்நிலை சீராகி நலமடைவார்” என்று தெரிவித்துள்ளார்.