गडहिंग्लज : कडगाव (ता. गडहिंग्लज) येथे गडहिंग्लज-गारगोटी मार्गावर रस्ता पार करणाऱ्या एका वृद्धाला अनोळखी वाहनाने धडक दिली. त्यात गंभीर जखमी सखाराम कृष्णा पाटील (वय ७०, रा. कडगाव) यांचा उपचार सुरू असताना मृत्यू झाला. बुधवारी (ता. १६) रात्री साडेसातच्या सुमारास ही घटना घडली.

गडहिंग्लज-गारगोटी रस्त्याचे काम सुरू आहे. मोरीचे काम सुरू असलेल्या ठिकाणी सखाराम पाटील घराकडे जाण्यासाठी रस्ता पार करत होते. त्यावेळी एका अज्ञात वाहनचालकाने रस्त्याच्या परिस्थितीकडे दुर्लक्ष करून भरधाव वेगात येऊन सखाराम यांना जोराची धडक दिली. त्यात सखाराम यांच्या छातीला, दोन्ही पायांना व डोक्याला गंभीर दुखापत झाली.

त्यांना उपचारासाठी दवाखान्यात दाखल केले. उपचार सुरू असताना त्यांचा मृत्यू झाल्याची फिर्याद त्यांचा मुलगा सुनील पाटील यांनी पोलिसांत दिली. वाहनचालकाच्या विरोधात गुन्हा पोलिसांत दाखल झाला आहे. सखाराम यांच्यामागे पत्नी, दोन मुले, सुना, नातवंडे असा परिवार आहे.