மத்தியப் பிரதேசத்தின் மந்த்சௌர் மாவட்டம் ஃபதேகர் கிராமத்தில் நடந்த ஒரு திருமண விழாவில் ரசமலாய் இனிப்பை உணவாக சாப்பிட்ட 125 பேர் திடீரென உடல் நல குறைவால் பாதிக்கப்பட்ட சம்பவம் பெரும் பரபரப்பை ஏற்படுத்தியுள்ளது.

பெண்கள், ஆண்கள் மற்றும் சிறு குழந்தைகள் வரை வாந்தி, குமட்டல் மற்றும் வயிற்றுப்போக்கு போன்ற அறிகுறிகளை அனுபவித்தனர். சனிக்கிழமை காலை உணவுக்குப் பிறகு இந்த அறிகுறிகள் தொடங்கியதாக தகவல்கள் தெரிவிக்கின்றன.

இந்நிலையைக் கேட்டவுடன், மாவட்ட மருத்துவமனையிலிருந்து மருத்துவ குழு ஃபதேகர் கிராமத்துக்கு விரைந்து வந்தது. உடனடியாக கிராமத்தில் உள்ள அரசுப் பள்ளி தற்காலிக மருத்துவமனையாக மாற்றப்பட்டு பாதிக்கப்பட்ட மக்களுக்கு சிகிச்சை அளிக்கப்பட்டது.

சுமார் இரண்டு மணி நேர சிகிச்சைக்குப் பிறகு பெரும்பாலான மக்கள் நிலைமை மேம்பட்டு வீடு திரும்பினர். இந்நிலையில், மக்கள் நலனுக்காக மாநில எம்.எல்.ஏ விபின் ஜெயின் மற்றும் நாடாளுமன்ற உறுப்பினர் சுதிர் குப்தா ஆகியோர் நேரில் வந்து பார்வையிட்டனர்.

மக்கள் உடல்நிலை குறித்து தகவல் அறிந்ததும், அவர்கள் உடனடியாக கிராமத்துக்கு சென்று பாதிக்கப்பட்டவர்களை நேரில் சந்தித்து ஆறுதல் கூறினர். ஆனால், மாவட்ட சுகாதார அதிகாரி (CMHO) மற்றும் மூத்த மருத்துவ ஊழியர்கள் வராததைப்பற்றி எம்பி குப்தா கடும் அதிருப்தி தெரிவித்தார்.

இதனைத்தொடர்ந்து, சுகாதார வசதிகளை உடனடியாக மேம்படுத்தும் நடவடிக்கைகள் மேற்கொள்ள வேண்டும் என்றும், இதுபோன்ற பிரமாண்ட விழாக்களில் உணவுப் பாதுகாப்பு கட்டுப்பாடுகளை கடைபிடிக்கச் செய்ய வேண்டும் என்றும் வலியுறுத்தப்பட்டுள்ளது.

மருத்துவர்களின் ஆரம்பத்திலான கணிப்பின் படி, 100 முதல் 125 பேர் வரை உடல் நலக்குறைவால் பாதிக்கப்பட்டுள்ளதாக கூறப்படுகிறது. இது போன்ற சம்பவங்கள் எதிர்காலத்தில் ஏற்படாமல் இருக்க, அரசு அதீத முன்னெச்சரிக்கைகளை மேற்கொள்ள வேண்டிய அவசியம் எழுந்துள்ளது.