बंगळूर : हिंदुत्ववादी कार्यकर्ता सुहास शेट्टी (Hindutva Activist Suhas Shetty) याची हत्या केल्याने मंगळूरमध्ये पुन्हा रक्तपात झाला आहे. सुहासच्या हत्येनंतर मंगळूर शहरातील परिस्थिती तणावपूर्ण बनली आहे. परिस्थिती संवेदनशील असल्याने जिल्हाधिकाऱ्यांनी मंगळूर जिल्हा (दक्षिण कन्नड) बंदचा आदेश जारी केला आहे.

२०२२ मध्ये सुरतकल्ल येथील फाझिल हत्याकांडातील (Fazil Massacre) मुख्य आरोपी आणि गुन्हेगार सुहास शेट्टीची गुरुवारी रात्री ८.२७ च्या सुमारास मंगळूरच्या बाहेरील बाजपे ठाण्याच्या (Mangalore Police Station) हद्दीतील किन्निपाडवू येथे निर्घृण हत्या करण्यात आली.

सुहास शेट्टी हा पूर्वी बजरंग दलाचा कार्यकर्ता होता आणि त्याच्यावर हत्येच्या प्रयत्नाचे अनेक गुन्हे दाखल होते. हिंदू कार्यकर्ते प्रवीण नेट्टारू यांच्या हत्येचा बदला घेण्यासाठी २८ जुलै २०२२ रोजी फाझिलची हत्या करण्यात आली. याप्रकरणात सुहास शेट्टी हा मुख्य आरोपी होता.

सुहासच्या हत्येची बातमी कळताच मंगळूर दक्षिणचे भाजप आमदार वेदव्यास कामत ए. जे. मंगळूर येथील रुग्णालयात पोहोचले. रुग्णालयासमोर मोठ्या संख्येने हिंदू कार्यकर्ते जमले होते. खबरदारीचा उपाय म्हणून रुग्णालयासमोर कडक पोलिस बंदोबस्त तैनात केला आहे.