अमेरिकेचे राष्ट्राध्यक्ष डोनाल्ड ट्रम्प या आठवड्यात आखाती देशांच्या दौऱ्यात कतारच्या राजघराण्याकडून लक्झरी बोईंग 747-8 जम्बो जेट भेट म्हणून स्वीकारण्याची शक्यता आहे. अमेरिकी अधिकारी या विमानाचे रूपांतर संभाव्य अध्यक्षीय विमानातही करू शकतात, असे मानले जात आहे.

ABC न्यूजने दिलेल्या वृत्तानुसार, ट्रम्प जानेवारी 2029 मध्ये आपला कार्यकाळ पूर्ण करण्यापूर्वी अमेरिकन राष्ट्राध्यक्षांचे अधिकृत विमान एअर फोर्स वनमध्ये नवीन भर म्हणून या विमानाचा वापर करतील. नवीन व्यावसायिक 747-8 विमानाची किंमत सुमारे 400 दशलक्ष डॉलर आहे.

डेमोक्रॅट्स आणि सुशासनाच्या समर्थकांनी या कथित योजनेचा निषेध केला आहे आणि म्हटले आहे की, यामुळे मोठ्या प्रमाणात नैतिक आणि कायदेशीर चिंता निर्माण झाली आहे. सिनेटचे डेमोक्रॅटिक सिनेटर चक शूमर यांनी ‘एक्स’वर लिहिले की, ‘कतारने आणलेल्या एअर फोर्स वनप्रमाणे ‘अमेरिका फर्स्ट’ असे काहीही म्हणत नाही. ही केवळ लाच नाही, तर अतिरिक्त लेगरूमसह परकीय प्रभाव आहे.

व्हाईट हाऊसने अद्याप या वृत्तावर कोणतीही प्रतिक्रिया दिलेली नाही. कतारचे प्रवक्ते अली अल-अन्सारी यांनी न्यूयॉर्क टाइम्सला सांगितले की, भेटवस्तूबद्दलचे वृत्त चुकीचे आहे कारण विमानाच्या संभाव्य हस्तांतरणाचा अद्याप विचार केला जात आहे आणि “कोणताही निर्णय घेण्यात आलेला नाही.”

अद्ययावत एअर फोर्स वन म्हणून काम करणाऱ्या नव्या 747-8 विमानांच्या वितरणात होत असलेल्या विलंबाबद्दल ट्रम्प यांनी नाराजी व्यक्त केली आहे. ट्रम्प यांनी आपल्या पहिल्या कार्यकाळात बोईंगसोबत 2024 मध्ये विमानांच्या डिलिव्हरीसाठी करार केला होता. गेल्या आठवड्यात अमेरिकेच्या हवाई दलाच्या एका अधिकाऱ्याने काँग्रेसला सांगितले की, बोईंगने 2027 पर्यंत विमाने पूर्ण करण्याचा प्रस्ताव ठेवला आहे.

फ्लोरिडाच्या पाम बीच आंतरराष्ट्रीय विमानतळावरील ट्रम्प यांच्या मार-ए-लागो रिसॉर्टजवळ उभ्या असलेल्या कतारच्या मालकीच्या 747-8 या विमानाला ट्रम्प यांनी फेब्रुवारीमध्ये भेट दिली होती. त्यावेळी व्हाईट हाऊसने म्हटले होते की, अद्ययावत एअर फोर्स वन विमाने कशी कॉन्फिगर केली जातील हे समजून घेण्यासाठी राष्ट्राध्यक्षांनी असे केले.

सौदी अरेबिया आणि संयुक्त अरब अमिरातीच्या दौऱ्यांचा समावेश असलेल्या ट्रम्प कतार दौऱ्यावर असताना या भेटवस्तूची घोषणा होण्याची शक्यता आहे. त्यांच्या दुसऱ्या कार्यकाळातील हा पहिलाच परदेश दौरा आहे. कतार सरकारने रविवारी रात्री प्रतिक्रिया देण्याच्या विनंतीला त्वरित प्रतिसाद दिला नाही.

परदेशी सरकारकडून अशी मौल्यवान भेट राष्ट्रपती स्वीकारतील का, या प्रश्नाला उत्तर देताना प्रशासकीय अधिकाऱ्यांनी सांगितले की, असे करणे कायदेशीर ठरेल.