Samruddhi Mahamarg Accident : समृद्धी महामार्गावर पुन्हा एक भीषण अपघाताची घटना घडली आहे. मध्यरात्रीच्या सुमारास समृद्धी महामार्गावर नागपूर कॉरिडॉरवर डोणगाव जवळ हा भीषण अपघात झाला आहे.

भरधाव वेगात जाणारी कार ट्रकला धडकल्याने कारचालक जागीच ठार झाल्याची घटना घडली आहे. प्राथमिक माहितीनुसार चालकाला डूलकी लागल्याने हा अपघात घडल्याचे समोर आलं आहे.

भूषण बळीराम मगर असे मृतक व्यक्तीचे नाव असून ते वाशिम जिल्ह्यातील मानका येथील रहिवासी आहेत. छत्रपती संभाजीनगर येथून आपल्या कारने समृद्धी महामार्गावरून वाशिमकडे जात असताना हा अपघात घडला आहे.

दरम्यान, अशीच एक अपघाताची घटना मुंबई-गोवा महामार्गावर घडली असून यात खाजगी बस आणि ट्रकमध्ये भीषण अपघात झाला आहे.

मुंबई-गोवा महामार्गावरील महाडजवळ पहाटेच्या सुमारास हा अपघात झाल्याची माहिती समोर आली असून या अपघातात 3 प्रवासी जखमी असल्याची माहिती आहे.

यात एक खासगी ट्रॅव्हल बस कोकणातून मुंबईच्या दिशेने जात होती. दरम्यान महाड शहराजवळ असलेल्या नडगाव जवळ हा अपघात घडला असल्याचे बोललं जात आहे.

अपघातातील जखमींना महाड येथील ट्रॉमा केअर हॉस्पिटलमध्ये उपचाराकरिता दाखल करण्यात आले आहे.

अतिवेगात असताना खासगी ट्रॅव्हल बसची आयसर टेम्पोला मागून जोरदार धडक बसल्याने हा अपघात घडला असून या अपघातात बसचे मोठे नुकसान झाल्याचे बघायला मिळते आहे.