इंडियन प्रीमयर लीग २०२५ स्पर्धेला ७४ सामन्यांनंतर अखेर विजेता मिळाला आहे. गेल्या अडीच महिन्यांपासून आयपीएल सुरू असलेला थरार अखेर ३ जून रोजी संपला. १८ वर्षांपासून प्रतिक्षा करणाऱ्या रॉयल चॅलेंजर्स बंगळुरूने विजेतेपदाला गवसणी घातली.

अहमदाबादमधील नरेंद्र मोदी स्टेडियमवर झालेल्या अंतिम सामन्यात मंगळवारी (३ जून) बंगळुरूने पंजाब किंग्सला अवघ्या ६ धावांनी पराभूत करत पहिल्यांदाच आयपीएल ट्रॉफीवर नाव कोरले. त्यामुळे रॉयल चॅलेंजर्स बंगळुरू आयपीएलचे आठवे आणि नवे विजेते ठरले.

या अंतिम सामन्यानंतर विजेत्या रॉयल चॅलेंजर्स बंगळुरू आणि उपविजेत्या पंजाब किंग्स संघाचा गौरव करण्यात आला. तसेच संपूर्ण पर्वात चांगली कामगिरी करणाऱ्या खेळाडूंना विविध पुरस्कारांनी गौरविण्यात आले.

यादरम्यान मोस्ट व्हॅल्युएबल खेळाडू म्हणजेच मालिकावीर पुरस्कारही देण्यात आला. हा मान मुंबई इंडियन्सचा मधल्या फळीतील फलंदाज पटकावला. सूर्यकुमार आयपीएल २०२५ मधील सर्वोत्तम खेळाडू म्हणून नावाजला गेला.

सूर्यकुमार यादवने यंदा सुरुवातीपासून शानदार कामगिरी बजावली. त्याने जवळपास प्रत्येक सामन्यात त्याचे योगदान दिले. दरम्यान, मुंबईला क्वालिफायर २ सामन्यात पंजाब किंग्सकडून पराभवाचा धक्का बसला होता. त्यामुळे त्यांचे आव्हान संपले. पण सूर्यकुमारने त्याच्या कामगिरीने सर्वांचे लक्ष वेधले होते.