पुणे शहरासह महाराष्ट्रात गेल्या काही दिवसांमध्ये सातत्याने कोरोना रुग्णांची संख्या वाढत असतानाच आता पुणेकरांची चिंता वाढवणारी माहिती पुढे आली आहे. शहरातील सर्व सांडपाणी प्रक्रिया प्लॅण्टमध्ये कोरोना विषाणूचे जनुकीय अंश सापडले असल्याची धक्कादायक माहिती राष्ट्रीय रसायन प्रयोगशाळेच्या (एनसीएल) तपासातून समोर आली आहे. राष्ट्रीय रसायन प्रयोगशाळेकडून 22 एप्रिल आणि 6 मे रोजी घेण्यात आलेले सांडपाण्याचे नमुने पॉझिटिव्ह आढळले असून, या सांडपाण्यात मिळालेल्या विषाणूंच्या जनुकीय अंशांची पातळी ही कोविड काळात जशी होती, तशीच आताही आहे.

सांडपाणी प्रक्रियेतून मिळणाऱ्या नमुन्यांच्या तपासणीतून तीव्र श्वसन सिंड्रोम कोरोना व्हायरस-2 (SARS-CoV-2) विषाणूचे जेनेटिक मटेरियल शोधले जाते. हा विषाणू संक्रमित व्यक्तींच्या मलमुत्रातून बाहेर पडतो. एनसीएलच्या वेस्टवॉटर सर्व्हिलन्स पद्धतीमुळे प्रशासनाला संपूर्ण शहरात कोरोनाच्या प्रसाराची पूर्वसूचना मिळते. तसेच कोरोनाचे संक्रमण आणि निदान न झालेल्या रुग्णांची माहिती आधीच उपलब्ध होते. सध्या शहरात कोरोना रुग्णांची संख्या वाढत असताना एनसीएलचे निरीक्षण हे आरोग्य विभागास रुग्णांचा मागोवा घेण्यास उपयोगी ठरणारे असल्याचे राष्ट्रीय रसायन प्रयोगशाळेचे मायक्रोबायोलॉजिस्ट डॉ. महेश धर्णे यांनी सांगितले.