क्रिकेट चाहत्यांना गेल्या अनेक दिवसांपासून इंग्लंड दौऱ्याची प्रतिक्षा लागून आहे. टीम इंडिया इंग्लंड विरुद्ध 5 कसोटी सामने खेळणार आहे. या मालिकेला 20 जूनपासून सुरुवात होणार आहे. टीम इंडियाने या मालिकेसाठी जोरदार तयारी केली आहे. शुबमन गिल याच्या नेतृत्वात टीम इंडिया या मलिकेत खेळणार आहे. दोन्ही संघांची ही वर्ल्ड टेस्ट चॅम्पियनशीप 2025-2027 या साखळीतील पहिलीच मालिका असणार आहे. त्यामुळे दोन्ही संघांचा या नव्या साखळीत विजयाने सुरुवात करण्याचा प्रयत्न असणार आहे. त्यामुळे या मालिकेत जोरदार चुरस पाहायला मिळणार आहे. तसेच अंडर 19 टीम इंडियाही या दरम्यान इंग्लंड दौऱ्यावर असणार आहे. वूमन्स सीनिअर टीम इंडियाही इंग्लंड दौऱ्यावर असणार आहे. या दरम्यान इंग्लंड दौऱ्यासाठी आणखी एक संघाची घोषणा करण्यात आली आहे.
मुंबई क्रिकेट असोसिएशनने इमर्जिंग टीमला इंग्लंड दौऱ्यावर पाठवण्याचा निर्णय घेतला आहे. एमसीएने इंग्लंड दौऱ्यासाठी टीम जाहीर केली आहे. या इंग्लंड दौऱ्यासाठी सूर्यांश शेडगे याला कर्णधारपदाची धुरा देण्यात आली आहे. मुंबई एमर्जिंग टीमचा 28 जूनपासून 1 महिन्याचा इंग्लंड दौरा असणार आहे. मुंबईची टीम या दौऱ्यात इंग्लंडमधील वेगवेगळ्या काउंटी आणि स्थानिक संघांविरुद्ध 5 दोन दिवसीय तर 4 वनडे मॅचेस खेळणार आहे. युवा खेळाडूंना आंतरराष्ट्रीय स्तरावरचा अनुभव मिळावा. तसेच खेळाडूंना कमी वयातच तांत्रिक, धोरणात्मक आणि मानसिकरित्या चालना देणं हा या दौऱ्यामागील प्रमुख उद्देश आहे.
इंग्लंड दौऱ्यासाठी मुंबई एमर्जिंग संघात अनेक खेळाडूंचा समावेश आहे. यातील काही खेळाडू हे आयपीएलमध्येही खेळले आहेत. यात सूर्यांश शेडगे, सर्फराज खान याचा भाऊ मुशीर खान (पंजाब किंग्स) आणि अंगकृष रघुवंशी (कोलकाता नाईट रायडर्स) यांचा समावेश आहे. तसेच या संघातील काही खेळाडूंनी रणजी ट्रॉफीत मुंबईचं प्रतिनिधित्व केलं आहे. त्यामुळे या खेळाडूंना इंग्लंड दौऱ्याचा चांगलाच फायदा होईल, असं म्हटलं तर वावगं ठरणार नाही.
दरम्यान मुंबई टीमसमोर इंग्लंड दौऱ्यात अनेक संघांचं आव्हान असणार आहे. या संघांमध्ये नॉटिंघमशर, वॉर्सेस्टरशर, ग्लूस्टरशर, आणि काउंटी चँलेंजर्स संघांचं आव्हान असणार आहे.
इंग्लंड दौऱ्यासाठी मुंबई एमर्जिंग टीम :सूर्यांश शेडगे (कॅप्टन), वेदांत मुरकर (उपकर्णधार), अंगकृष रघुवंशी, आयुष वर्तक, आयुष जिमारे, हिमांशु सिंह, मनन भट्ट, मुशीर खान, निखिल गिरी, प्रग्नेश कनपिल्लेवार, प्रतीककुमार यादव, प्रेम देवकर, प्रिंस बदियानी, झैद पाटणकर, हृषिकेश गोरे आणि हर्षल जाधव.
