iran israel war: इराण आणि इस्त्रायल यांच्यात सातव्या दिवशीही भीषण युद्ध सुरु आहे. दोन्ही देशांकडून एकमेकांवर क्षेपणास्त्र आणि ड्रोन हल्ले केले जात आहे. या दरम्यान धक्कादायक माहिती समोर आली आहे. इस्त्रायल आपल्या सुरक्षेसाठी सर्वात महागडी सशास्त्रे वापरत आहे. इराणी क्षेपणास्त्र आणि ड्रोन हल्ले रोखण्यासाठी इस्त्रायल प्रत्येक रात्री कोट्यवधी रुपये खर्च करत आहे. इस्त्रायलच्या डिफेंसिव्ह इंटरसेप्टरची किंमत खूप जास्त आहे. इस्त्रायल इराणचे हल्ले रोखण्यासाठी किती खर्च करत आहे, जाणून घेऊ या.
इस्त्रायल मल्टी लेअर मिसाईल डिफेन्स सिस्टमवर मोठा खर्च करत आहे. त्यात तीन प्रमुख इंटरसेप्टर प्रणालीचा सहभाग आहे. एरो सिस्टम, डेव्हिड्स स्लिंग आणि आयरन डोम यांचा समावेश आहे. या सिस्टम दीर्घ टप्प्याच्या बॅलिस्टिक क्षेपणास्त्राच्या बचावासाठी तैनात केल्या आहेत. उंचीवर असलेल्या क्षेपणास्त्र हे अवकाशात नष्ट करते.
वॉल स्ट्रीट जर्नलच्या रिपोर्टनुसार, अमेरिकेला या संकटाची माहिती अनेक महिन्यांपूर्वी मिळाली. आता युद्धाची परिस्थिती पाहिल्यावर इस्त्रायलला आपल्या डिफेंस इंटरसेप्टर्सचा खर्च आणि स्टॉक अशा दुहेरी संकटाचा सामना करावा लागत आहे. हे युद्ध दीर्घकाळ सुरु राहिल्यास इस्त्रायलच्या आर्थिक परिस्थितीवरच परिणाम होणार नाही तर त्यांची संरक्षण प्रणालीही धोक्यात येऊ शकते, असे तज्ज्ञांकडून सांगण्यात येत आहे. यामुळे आता इस्त्रायलला अमेरिकेच्या पाठिंब्याची सर्वाधिक गरज आहे.
