मुंबई : आयपीओमध्ये गुंतवणूक करणाऱ्या गुंतवणूकदारांसाठी एक आनंदाची बातमी आहे. आगामी काळात आयपीओ मार्केट अधिक तेजीत येणार आहे. आठ कंपन्या जूनच्या अखेरीस आणि जुलैमध्ये आयपीओ लाँच करण्याची तयारी करत आहेत. या कंपन्यांचा आयपीओ २६,००० कोटी रुपयांपेक्षा जास्त असण्याची शक्यता आहे.



कोणत्या कंपन्या IPO आणणार

एचडीबी फायनान्शियल सर्व्हिसेस, संभव स्टील ट्यूब्स, अॅलनबेरी इंडस्ट्रियल गॅसेस, कल्पतरू, ग्लोब सिव्हिल प्रोजेक्ट्स, एनएसडीएल, हिरो फिनकॉर्प आणि जेएसडब्ल्यू सिमेंटचे आयपीओ जूनच्या शेवटच्या आठवड्यात आणि जुलै महिन्यात येणार आहेत.



एचडीबी फायनान्शियल सर्व्हिसेस

एचडीबी फायनान्शियल सर्व्हिसेस लवकरच त्यांचा आयपीओ लाँच करणार आहे. आयपीओचा आकार १२,५०० कोटी रुपये असेल. यामध्ये २,५०० कोटी रुपयांचे नवीन शेअर्स आणि १०,००० कोटी रुपयांचे शेअर्स ओएफएसमध्ये विकले जातील. कंपनी २४ जून रोजी अँकर गुंतवणूकदारांसाठी आणि २५ ते २७ जून दरम्यान सामान्य गुंतवणूकदारांसाठी हा आयपीओ उघडू शकते. बाजार विश्लेषकांचे म्हणणे आहे की सध्या या आयपीओचा किंमत पट्टा निश्चित झालेला नाही. परंतु एचडीबी फायनान्शियल सर्व्हिसेसचे शेअर्स ग्रे मार्केटमध्ये प्रति शेअर ९३ रुपयांच्या प्रीमियमवर व्यवहार करत आहेत.

संभव स्टील ट्यूब्स

मार्चमध्ये सेबीची मंजुरी मिळाल्यानंतर संभव स्टील ट्यूब्स लवकरच त्यांचा ५४० कोटींचा आयपीओ लाँच करणार आहे.



अॅलनबेरी इंडस्ट्रियल गॅसेस आणि कल्पतरू

या कंपन्यांना गेल्या वर्षी जानेवारी आणि नोव्हेंबरमध्ये सेबीकडून मान्यता मिळाली. या कंपन्या त्यांच्या आयपीओद्वारे अनुक्रमे ४०० कोटी आणि १,५९० कोटी उभारण्याची योजना आखत आहेत.



JSW सिमेंट

जानेवारीमध्ये सेबीकडून मंजुरी मिळाल्यानंतर JSW सिमेंटने ४,००० कोटींच्या आयपीओची तयारी सुरू केली आहे. हा आयपीओ जुलैमध्ये बाजारात येण्याची शक्यता आहे.

ग्लोब सिव्हिल प्रोजेक्ट्स

हा आयपीओ २४ जून रोजी सबस्क्रिप्शनसाठी खुला होईल आणि २६ जून रोजी बंद होईल. किंमत पट्टा प्रति शेअर ६७-७१ रुपये निश्चित करण्यात आला आहे. कंपनीने आयपीओमधून २०० कोटी रुपये उभारण्याचे उद्दिष्ट ठेवले आहे.



हिरो फिनकॉर्प

प्री-आयपीओ फंडिंग राउंडमध्ये २६० कोटी रुपये उभारल्यानंतर हिरो फिनकॉर्पने त्यांच्या आयपीओचा आकार २,१०० कोटींवरून १,८४० कोटींपर्यंत कमी केला आहे. १,५६८.१३ कोटीच्या ओएफएससह एकूण आयपीओ आकार ३,४०८.१३ कोटी रुपये आहे.



एनएसडीएल

एनएसडीएलचा आयपीओ जुलैमध्ये येण्याची शक्यता आहे. ब्लूमबर्गच्या अहवालानुसार, NSDL चा IPO ३,४०० कोटींचा असेल.