இந்தியாவில் 2008-ல் தொடங்கிய ஐ.பி.எல்லில் 2010 வரை மூன்று சீசன்களாக 8 அணிகள் பங்கேற்று விளையாடி வந்தன.

பின்னர், 2011 சீசனில் இலங்கையின் முன்னாள் கேப்டன் ஜெயவர்த்தனே தலைமையில் கொச்சி டஸ்கர்ஸ் கேரளா என்ற பெயரில் களமிறங்கியது.

அந்த சீசனில் கொச்சி அணி 14 போட்டிகளில் 6 வெற்றி, 8 தோல்விகளுடன் புள்ளிப்பட்டியலில் 8-வது இடம் பிடித்தது.

அதையடுத்து, அதே ஆண்டு செப்டம்பரில் கொச்சி அணி, தங்களது வங்கி உத்தரவாதத்தை அளிப்பதாக பி.சி.சி.ஐ-க்கு கடிதம் அனுப்பியது.

ஆனால், அந்தக் கடித்ததை நிராகரித்த பி.சி.சி.ஐ, உரிய நேரத்தில் வங்கி உத்தரவாதத்தை சமர்ப்பிக்காததால் கொச்சி அணியின் உரிமத்தை ரத்து செய்ததால், 2012 ஐ.பி.எல் சீசனில் அந்த அணியால் விளையாடமுடியவில்லை.

இதனால், பி.சி.சி.ஐ-க்கு எதிராக நடுவர் தீர்ப்பாயத்தில் கொச்சி அணி வழக்கு தொடுத்தது.

இந்த வழக்கில், கடந்த 2015-ல் பி.சி.சி.ஐ செயல் தவறு என்று தீர்ப்பளித்த நடுவர் தீர்ப்பாயம், கொச்சி கிரிக்கெட் பிரைவேட் லிமிடெட் (KCPL) நிறுவனத்துக்கு ரூ. 384.8 கோடியும், ரெண்டெஸ்வஸ் ஸ்போர்ட்ஸ் வேர்ல்ட் (RSW) நிறுவனத்துக்கு ரூ.153.3 கோடியும் செலுத்துமாறு பி.சி.சி.ஐ-க்கு உத்தரவிட்டது.

இருப்பினும், பி.சி.சி.ஐ நடுவர் தீர்ப்பாயத்தின் இத்தகைய தீர்ப்பை எதிர்த்து மும்பை உயர் நீதிமன்றத்தில் மேல்முறையீடு செய்தது. சுமார் ஒன்பது ஆண்டுகளாக இந்த வழக்கு நடைபெற்றுவந்தது.

இந்த நிலையில், மும்பை உயர் நீதிமன்ற நீதிபதி ஆர். சாக்லா, பி.சி.சி.ஐ-யின் மேல்முறையீட்டு மனுவை தள்ளுபடி செய்தார்.

அதோடு, ஏற்கெனவே நடுவர் தீர்ப்பாயம் கூறியபடி கொச்சி டாஸ்கர்ஸ் ரூ. 538 கோடி செலுத்துமாறு நீதிபதி ஆர். சாக்லா நேற்று உத்தரவிட்டார்.

மேலும், இதில் மேல்முறையீட்டுக்கு செல்ல உயர் நீதிமன்றம் 6 வாரம் கால அவகாசம் வழங்கியிருக்கும் நிலையில், உச்ச நீதிமன்றத்தை நாடவிருப்பதாக பி.சி.சி.ஐ தரப்பு வழக்கறிஞர்கள் தெரிவித்திருக்கின்றனர்.

முதலில் கொச்சி டஸ்கர்ஸ் கேரளா அணியின் உரிமையானது RSW தலைமையிலான கூட்டமைப்பிடம் வழங்கப்பட்டது. பின்னர், KCPL-யால் நடத்தப்பட்டது என்பது குறிப்பிடத்தக்கது.

சினிமா விகடனின் பிரத்யேக Whatsapp க்ரூப்

சினிமா தொடர்பான எக்ஸ்க்ளூசிவ் அப்டேட், அசத்தல் பேட்டிகள், டி.வி அப்டேட்கள் என எதையும் மிஸ் செய்யாமல் தெரிந்து கொள்ள...

உங்கள் வாட்ஸ் அப் மூலமே இணைந்திருங்கள் சினிமா விகடனுடன்...