லக்னோ நகரத்தில் பரபரப்பை ஏற்படுத்திய மிகப்பெரிய மோசடி வெளிவந்துள்ளது. உஸ்பெகிஸ்தானைச் சேர்ந்த ஹோலிடா மற்றும் நிலோஃபர் என்ற இரு பெண்கள், இந்தியாவில் எந்தவொரு பாஸ்போர்ட், விசா ஆவணங்களும் இல்லாமல் இரகசியமாக வாழ்ந்துள்ளனர். அவர்களின் உண்மையான அடையாளங்களை மறைக்க, பிளாஸ்டிக் சர்ஜரி மூலம் முகத்தை மாற்றி, அவர்கள் மீது சந்தேகம் எழாமல் வைத்து வந்ததாக தெரிய வந்துள்ளது. இந்த அறுவை சிகிச்சையை லக்னோவில் உள்ள டாக்டர் விவேக் குப்தா என்பவர் செய்ததாக கண்டறியப்பட்டுள்ளது.

டாக்டர் விவேக் குப்தா, சுல்தான்பூர் சாலையில் உள்ள அஹிமாமாவ் மற்றும் கோமதி நகரில் பத்ரகர்புரத்தில் உள்ள மினெர்வா கிளினிக் ஆகிய இரண்டு இடங்களிலும் தனியார் மருத்துவமனைகளை நடத்தி வந்தவர். விசாரணையின் போது, இவர் இந்த இரு உஸ்பெக் பெண்களுக்கு முகம் மாற்றும் அறுவை சிகிச்சை செய்து, அவர்களுக்கு லக்னோவில் தங்கும் வசதி செய்து கொடுத்ததோடு, அவர்களை சட்டவிரோதமாக பாலியல் தொழிலில் ஈடுபடுத்தியதாகக் கூறப்படுகிறது. இந்த விவகாரம் வெளிநாட்டு பிராந்திய பதிவு அலுவலகம் (FRRO) குழுவை அதிர்ச்சிக்குள்ளாக்கியுள்ளது.

இந்தப் பெண்களுக்கு அர்ஜுன் ராணா என்ற நபர் வழிகாட்டியதாகவும், அவரும் இந்தப் பணியில் நேரடியாக ஈடுபட்டுள்ளதாகவும் தெரியவந்துள்ளது. இந்த அர்ஜுன் ராணா, ‘ட்ரிஜின் ராஜ்’ என்ற பெயரிலும் செயல்பட்டு, தன்னை பத்திரிகையாளர் எனச் சொல்லிக் கொண்டு சட்டத்தை மீறி இவர்களுக்கு உதவினார். லக்னோவில் ஓமாக்ஸ் ஹஸ்ரத்கஞ்ச் பகுதியில் உள்ள ஐந்தாவது மாடி குடியிருப்பில் அவர்கள் இரகசியமாக வசித்து வந்ததை போலீசார் சோதனையின் போது கண்டுபிடித்தனர். ஆவணங்கள் இல்லாமல் உள்ளோர், சட்டவிரோத தங்குதல், போலி அடையாளம், சட்ட விரோத தொழில்களில் ஈடுபடுதல் உள்ளிட்ட பல பிரிவுகளின் கீழ் வழக்குகள் பதியப்பட்டுள்ளன.

இந்த கும்பலை இயக்கியதாக கூறப்படும் தலைவி லயோலா என்பவள், உஸ்பெகிஸ்தானைச் சேர்ந்தவர். இவருக்கு எதிராக அந்த நாட்டில் ஏற்கனவே லுக் அவுட் நோட்டீஸ் பிறப்பிக்கப்பட்டுள்ளது. லயோலா இந்தியாவிற்கு தப்பி வந்து, லக்னோவில் ரகசியமாக வாழ்ந்து வந்துள்ளார். இங்கு அவர் அர்ஜுனை மணந்து, தனது அடையாளத்தை மாற்றிக்கொண்டு போலி வாழ்க்கை நடத்தி வந்துள்ளார். தற்போது, இந்த சம்பவம் தொடர்பாக FRRO குழுவும் லக்னோ போலீசாரும் இணைந்து தீவிர விசாரணை செய்து வருகின்றனர். மேலும் இந்த வழக்கில் இன்னும் பலர் ஈடுபட்டிருக்க வாய்ப்பு இருப்பதால், விசாரணை விரிவாக்கம் செய்யப்படுகிறது.