अमेरिकेने इराणच्या तीन आण्विक केंद्रांवर हल्ले केले आहेत. अमेरिकेचे राष्ट्राध्यक्ष डोनाल्ड ट्रम्प यांनीच या हल्ल्यांची पुष्टी केली आहे. फोर्डो, नतांज, इस्फहान या भागात असलेल्या आण्विक केंद्रांवर हे हल्ले करण्यात आले आहेत. दरम्यान, इराण आणि इराक यांच्या युद्धात अमेरिकेने उडी घेतल्यामुळे संपूर्ण जगाची चिंता वाढली आहे. अमेरिकेच्या या धोरणामुळे मध्य-पूर्वेतील संघर्ष आणखी वाढण्याची शक्यता आहे. याच कारणामुळे इंधन, नैसर्गिक वायू यांचा भाव गगनाला भिडण्याची शक्यता व्यक्त केली जात आहे.
इस्रायल-इराण यांच्यातील युद्धामुळे एका आठवड्यात ब्रेंड क्रूड ऑईलची किंमत तब्बल 18 टक्क्यांनी वाढली आहे. ब्रेंट क्रूड ऑईलची किंमत आता 75 डॉलर्स प्रति बॅरलच्या आसपास पोहोचली आहे. अमेरिकेनेही इराण-इस्रायल यांच्यातील युद्धात उडी घेतल्यामुळे आता कच्च्या तेलाची किंमत आणखी वाढण्याची शक्यता आहे. तज्ज्ञांच्या मते हा संघर्ष आणखी वाढला तर कच्च्या तेलाची किंमत प्रति बॅरल 120 डॉलर्सपर्यंत पोहोचू शकते.
इस्रायल आणि इराण यांच्यतील युद्धामुळे होरमूज जलडमरुमध्य या भागाला हाय रिस्क झोन म्हणून घोषित करण्यात आलं आहे. याच भागातून जास्तीत जास्त कच्या तेलाची निर्यात केली जाते. होरमूज हा भाग हाय रिस्क झोन घोषित केल्यानंतर विमा कंपन्यांनी आपले प्रिमियम वाढवले आहेत. अनेक शिपिंग कंपन्यांनी होरमूज या भागातून जाण्याऐवजी अन्य वैकल्पिक रस्त्याने जाण्याचा पर्याय निवडला आहे. यामुळेच आता कच्च्या तेलाच्या निर्यातीसाठी लागणारा वेळ आणि खर्च हे दोन्ही वाढले आहेत.
उर्जा क्षेत्रातील तज्ज्ञांच्या मते होरमूज जलडमरुमध्य या भागातील कच्च्या तेल्याचा निर्यातीत काही बाधा निर्माण झाली तर यामुळे कच्च्या तेलाची किंमत वाढ शकते. क्रूड ऑईलचा भाव थेट 120 डॉलर्स प्रति बॅरलपर्यंत पोहोचू शकतो. जेपी मॉर्गन, सिटी बँक आणि डॉयचे बँक यासारख्या अनेक वित्तीय संस्थांनी तर इराण-इस्रायल संघर्ष असाच कायम राहिला तर कच्च्या तेलाची किंमत तब्बल 130 डॉलर्स प्रति बॅरलपर्यंत पोहोचू शकते, असे भाकित व्यक्त केले आहे.
दरम्यान, आता इराण-इस्रायल यांच्यातील युद्धात अमेरिकेने उडी घेतल्यानं शेअर बाजारदेखील गडगडला आहे. अमेरिकी शेअर बाजारात घसण पाहायला मिळाली आहे. गुंतवणूकदार शेअर बाजारातून पैसा काढून आता सोने आणि अन्य क्षेत्रांत गुंतवणूक करत आहेत.
