लीड्समधील हेडिंग्ले येथे होत असलेल्या कसोटी मालिकेतील पहिल्या सामन्यात इंग्लंड क्रिकेट संघाने पहिल्या डावात भारतीय संघाला चोख प्रत्युत्तर दिलं आहे. ऑली पोप आणि हॅरी ब्रुकच्या शानदार खेळानंतर इंग्लंडच्या तळातल्या फलंदाजांनीही भारतीय गोलंदाजांना सतावलं होतं. पण तरी जसप्रीत बुमराहने घेतलेल्या ५ विकेट्सच्या जोरानर भारताने पहिल्या डावात ६ धावांची आघाडी घेतली.

या सामन्यात भारताचा पहिला डाव दुसऱ्या दिवशी ४७१ धावांवर संपुष्टात आला होता. त्यानंतर इंग्लंडचा संघ पहिल्या डावातील फलंदाजीसाठी उतरला. इंग्लंडकडून झॅक क्रावली आणि बेन डकेट यांनी डावाची सुरुवात केली. पण जसप्रीत बुमराहने पहिल्याच षटकात क्रावलीला ४ धावांवर करूण नायरच्या हातून झेलबाद केले.

पण त्यानंतर बेन डकेटला ऑली पोपची भक्कम साथ मिळली. डकेटचा १५ धावांवर झेलही सुटला होता, ज्याचा त्याने फायदा घेत अर्धशतकी खेळी साकारली. डकेट आणि पोप यांच्यात दुसर्या विकेटसाठी १२२ धावांची भागीदारी झाली, ज्यामुळे इंग्लंडच्या डावाचा पाया रचला गेला. अखेर ६२ धावांवर बुमराहने डकेटला अप्रतिम चेंडू टाकत त्रिफळाचीत केले.

पण जो रुटने पोपला साथ दिली. त्यांच्यातही ८० धावांची भागीदारी झाली. ज्यामुळे इंग्लंडने ४७ षटकांच्या आतच २०० धावा पार केल्या होत्या. पण अखेर ४७ व्या षटकात बुमराहनेच जो रुटला २८ धावांर करूण नायरच्याच हातून झेलबाद केले. पण तोपर्यंत पोपने शतक केले होते. दुसऱ्या दिवसाचा खेळ संपला, तेव्हा इंग्लंडने ३ बाद २०९ धावा केल्या होत्या. पोप १०० धावांवर नाबाद होता, तर हॅरी ब्रुक शून्यावर नाबाद होता.