India vs England 2nd Test Live Updates in Marathi Cricket News : इंग्लंड घरच्या मैदानावर रडकुंडीला आलेले पाहायला मिळाले... शुभमन गिलच्या नेतृत्वाखाली खेळणाऱ्या टीम इंडियाने एडबॅस्टन कसोटीत यजमानांना सडेतोड उत्तर दिले. पहिल्या कसोटीतील पराभवानंतर भारताकडून असा खेळ पाहायला मिळेल, याची अपेक्षा इंग्लंडनेही केली नव्हती. पण, यशस्वी जैस्वालच्या आक्रमक सुरुवातीनंतर गिलने झळकावलेले द्विशतक ऐतिहासिक ठरले.

यशस्वी जैस्वालने ८७ धावांची खेळी केल्यानंतर लोकेश राहुल ( २), करुण नायर ( ३१) आणि रिषभ पंत ( २५) हे अपयशी ठरले. पण, यशस्वी व शुभमन गिल यांनी चौथ्या विकेटसाठी मजबूत भागीदारी केली. त्यानंतर शुभमन व रवींद्र जडेजा यांनी सहाव्या विकेटसाठी २०३ धावा जोडून संघाला मजबूत स्थितीत आणले. जडेजा १३७ चेंडूंत १० चौकार व १ षटकारासह ८९ धावांवर बाद झाला. शुभमनने गिअऱ बदलताना द्विशतक झळकावले आणि इंग्लंडमध्ये कर्णधार म्हणून द्विशतक करणारा तो पहिला भारतीय फलंदाज ठरला. ( शुभमन गिलचे द्विशतक अन् अनेक विक्रम - एका क्लिकवर)

संघात अतिरिक्त फलंदाज म्हणून खेळवलेल्या वॉशिंग्टन सुंदरनेही ताबडतोड फटकेबाजी करताना शुभमनसह सातव्या विकेटसाठी २३ षटकांत शतकी भागीदारी पूर्ण केली. शुभमनने २२२ वी धाव घेताच इंग्लंडमधील भारतीय फलंदाजाची ही सर्वोत्तम वैयक्तिक खेळी ठरली. यापूर्वी १९७९ मध्ये सुनील गावस्करांनी २२१ धावा केल्या होत्या. भारताचा कर्णधार म्हणूनही परदेशातील ही सर्वोत्तम खेळी ठरली. विराट कोहीलने २०१६ मध्ये अँटिग्वा येथे वेस्ट इंडिजविरुद्ध २०० धावा केल्या होत्या आणि तो विक्रम शुभमनने मोडला.