रक्षाबंधन हा केवळ राखी बांधण्याचा सण नाही, तर भावंडांमधील प्रेम, आठवणी, आणि सोबतीचा एक सुंदर क्षण असतो. घरी एकत्र जमणं ही आनंदाची गोष्ट असली, तरी यावर्षी त्या भेटीत एक वेगळेपणा द्यायचा असेल, तर ट्रिपची जोड द्या. कारण प्रवास केवळ स्थळं दाखवत नाही, तर नात्यांमध्ये नवसंवाद आणि नवस्मृती देखील घडवतो. विशेषतः जेव्हा तो प्रवास आपल्या लहानपणाच्या भांडणांच्या जोडीदारासोबत आपल्या भावंडांसोबत असतो. (raksha bandhan sibling trip destinations 2025)

उदयपूर: उदयपूर हे राजस्थानमधील सर्वात सुंदर शहरांपैकी एक. इथले राजवाडे, जलमहल, पिचोला तलाव आणि प्राचीन बाजारपेठा तुमच्या सहलीत भर घालतात. भावंडांसोबत इथल्या सांस्कृतिक कार्यक्रमांमध्ये सहभागी होता येईल, आणि एकत्र वेळ घालवताना जुन्या आठवणी उगाळल्या जातील.

लडाख: जर तुम्ही आणि तुमचं भावंड थोडं साहसी स्वभावाचं असेल, तर लडाख ही ट्रिप नक्कीच लक्षात राहणारी ठरेल. कारने किंवा बाईकने रोड ट्रिप, रंगीबेरंगी मठ, नुब्रा व्हॅली आणि पॅंगॉन्ग तलाव यांचं सौंदर्य मनात कायमचं घर करेल. सहलीदरम्यान झालेली चर्चा आणि अनुभव तुमचं नातं आणखी घट्ट करतील.

मसुरी: उत्तराखंडमधील मसुरी हे एक आदर्श हिल स्टेशन आहे. इथल्या थंड हवामानात गरम चहा घेत बसणं, मॉल रोडवर एकत्र फिरणं, आणि केबल कारमधून मिळणारा विहंगम नजारा हे क्षण रक्षाबंधनाच्या आठवणीत अधिक रंग भरतील. मसुरीजवळचं लँडोर हेही एक शांत ठिकाण आहे जिथे काही तास घालवले तरी समाधान मिळेल.

चोप्टा: ज्यांना थोडं अ‍ॅडव्हेंचर आवडतं, त्यांच्या साठी उत्तराखंडमधील चोपटा हे उत्तम ठिकाण आहे. इथलं ट्रेकिंग, हिमाच्छादित पठारं आणि ताज्या हवेचा अनुभव अविस्मरणीय असतो. ट्रेकदरम्यान एकमेकांना दिलेली साथ, मदतीचा हात, आणि उंचीवर एकत्र घेतलेले फोटो हे तुमच्या नात्याचा नवीन अध्याय सुरू करतील.

वृंदावन: वृंदावन हे केवळ धार्मिक स्थळ नाही, तर आत्मिक शांततेचा अनुभव देणारं ठिकाण आहे. तुम्ही कृष्ण मंदिरांना भेट देऊन भाविकतेत रमून जाल, आणि एकत्र घालवलेला वेळ तुम्हा दोघांनाही जवळ आणेल. यासोबत मथुरा किंवा गोवर्धन परिक्रमा करण्याची संधीही इथे मिळेल.