ஈரோடு மாவட்டம் கொடுமுடி அருகே உள்ள கொல்லம் புதுப்பாளையத்தைச் சேர்ந்த விஜயகுமார் (வயது 65), கிராம உதவியாளராக பணியாற்றியவர். கடந்த 7 ஆண்டுகளுக்கு முன்பு ஓய்வுபெற்ற இவர், தனது மனைவி சரோஜாவுடன் கூடி வாழ்க்கை நடத்தி வந்தார்.

பல மாதங்களாக பக்கவாத நோயால் அவதிப்பட்டுவரும் சரோஜா, நேற்று முன்தினம் கரூர் அரசு மருத்துவமனையில் சிகிச்சை பலனின்றி உயிரிழந்தார். மனைவியின் மரணத்தால் பெரும் வேதனையில் ஆழ்ந்த விஜயகுமார், உறவினர்களிடம் கூட பேச முடியாத அளவிற்கு மனஉளைச்சலில் இருந்துள்ளார்.

சரோஜாவின் உடலை நல்லடக்கம் செய்ய உறவினர்கள் தயாராகிக் கொண்டிருந்த நேரத்தில், வீட்டில் இருந்த விஜயகுமார் திடீரென மாயமாகி விட்டார். அவரது திடீர் காணாமல் போனதைக் கவனித்த உறவினர்கள் பதறி, பல இடங்களில் தேடினர். சற்று நேரத்தில் வீட்டிற்கு அருகே உள்ள மயானத்தில் விஜயகுமாரின் மோட்டார் சைக்கிள் நிறுத்தப்பட்டிருந்ததை பார்த்த அவர்கள், மயானத்தின் உள்ளே சென்று தேடினர்.

அங்கு ஒரு பகுதியில், ஒருவரது உடல் தீயில் எரிந்த நிலையில் கிடப்பதை கண்ட அவர்கள் அதிர்ச்சியடைந்தனர். உடனடியாக கொடுமுடி போலீசாருக்கு தகவல் தெரிவிக்கப்பட்டது. போலீசார் விரைந்து வந்து உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும் சம்பவ இடத்திலிருந்து கைப்பற்றப்பட்ட மோட்டார் சைக்கிளில் ஒரு கடிதம் இருந்தது.

அந்த கடிதத்தில், “மனைவியின் மரணத்தை தாங்கிக்கொள்ள முடியவில்லை. எனவே, இந்த முடிவை எடுக்கிறேன். இதில் யாருக்கும் எந்தத் தொடர்பும் இல்லை” என விஜயகுமார் எழுதியிருந்தது தெரிய வந்தது. இதனையடுத்து, அவர் மயானத்தில் தீக்குளித்து தற்கொலை செய்தது உறுதியானது.

இது தொடர்பாக கொடுமுடி போலீசார் வழக்குப்பதிவு செய்து தீவிர விசாரணை நடத்தி வருகின்றனர். மனைவியின் இறந்த துக்கத்தில், உடல் நல்லடக்கம் செய்யும் முன் கணவர் தற்கொலை செய்து கொண்ட சம்பவம் அப்பகுதி மக்கள் மத்தியில் பெரும் சோகத்தை ஏற்படுத்தியுள்ளது.