• मँचेस्टर कसोटी अनिर्णित राखत भारताने पराभव टाळला.

• केएल राहुल, शुभमन गिल, रवींद्र जडेजा आणि वॉशिंग्टन सुंदर यांच्या दमदार खेळाने भारतासाठी हा सामना वाचवला.

• पण या सामन्याच्या अखेरीस जडेजा आणि स्टोक्समध्ये शाब्दिक चकमक झाली, ज्यावर आर अश्विनने प्रतिक्रिया दिली आहे.

मँचेस्टरला इंग्लंडविरुद्ध झालेला चौथा कसोटी सामना भारताने अनिर्णित राखण्यात यश मिळवले आहे. पराभवाची टांगती तलवार डोक्यावर असताना शेवटच्या दोन दिवसात केएल राहुल, कर्णधार शुभमन गिल, रवींद्र जडेजा आणि वॉशिंग्टन सुंदर यांनी दमदार कामगिरी करत हा सामना अनिर्णित राखला.

मात्र सामन्याच्या अखेरीस या नाट्यमय घटना घडली. त्यावर आर अश्विननेही प्रतिक्रिया दिली असून इंग्लंडचा कर्णधार बेन स्टोक्सला त्याने खडेबोल सुनावले आहेत.

झाले असे की इंग्लंडने या सामन्यात ३११ धावांची आघाडी घेतल्यानंतर भारतीय संघ दुसऱ्या डावात फलंदाजीला उतरला. भारताने पहिल्या दोन विकेट्स यशस्वी जैस्वाल आणि साई सुदर्शन यांच्या रुपात पहिल्याच षटकात गमावल्या होत्या. पण नंतर केएल राहुल आणि शुभमन गिल यांनी १८८ धावांची भागीदारी केली.

पाचव्या दिवसाच्या पहिल्या सत्रात केएल राहुल ९० धावांवर आणि शुभमन गिल १०३ धावांवर बाद झाला. त्यानंतर रवींद्र जडेजा आणि वॉशिंग्टन सुंदर यांनी नाबाद द्विशतकी भागीदारी केली. जडेजा १०७ धावांवर आणि वॉशिंग्टन सुंदर १०१ धावांवर नाबाद राहिला. जडेजा आणि सुंदर यांनी पाचव्या दिवसाचे शेवटचे दोन्ही सत्र खेळून काढल्याने हा सामना अनिर्णित राहिला.

दरम्यान, सामना संपण्याच्या काही क्षण आधी जडेजा आणि इंग्लंडचा कर्णधार बेन स्टोक्स यांच्यात शाब्दिक चकमक घडली होती. झाले असे की सामना अनिर्णित राहिल, हे स्पष्ट झालं होतं अशावेळी इंग्लंडचा कर्णधार बेन स्टोक्स जडेजाकडे खेळ संपण्याबाबत विचारण्यासाठी आला.

त्यावेळी जडेजा आणि सुंदर दोघेही शतकांच्या अगदी जवळ होते. त्यामुळे त्यांनी त्याला नकार दिला. इंग्लंडचा संघाने १३५ षटकांहून अधिक काळ क्षेत्ररक्षण केलेलं होतं, त्यामुळे ते वैतागले होते आणि हा खेळ थांबवू इच्छित होते कारण निकाल अनिर्णितच राहणार होता.

यावेळी जडेजाने त्यावेळी खेळ थांबवण्यास नकार दिल्याने बेन स्टोक्स वैतागला होता. त्याने जडेजाला स्लेजिंग करताना असंही म्हणाला की तुला हॅरी ब्रुकविरुद्ध खेळून शतक करायचं आहे का? ब्रुक इंग्लंडचा फलंदाज असून फार क्वचित गोलंदाजी करताना दिसतो.