मुंबई : सध्या शेअर बाजाराला टॅरिफ वॉर आणि भू-राजकीय तणावासारख्या आव्हानांमध्ये मोठ्या चढ-उतारांचा सामना करावा लागत आहे. अशा परिस्थितीत गुंतवणूकदार सुरक्षित मानल्या जाणाऱ्या फ्लेक्सी कॅप फंडांकडे वळले. असोसिएशन ऑफ म्युच्युअल फंड्स इन इंडिया (एएमएफआय) च्या आकडेवारीनुसार, गेल्या महिन्यात जुलैमध्ये सेक्टरल फंडांनंतर सर्वाधिक गुंतवणूक फ्लेक्सी कॅप फंडांमध्ये झाली. गुंतवणूकदारांनी या फंडांमध्ये ७,६५४ कोटी रुपये गुंतवले.



flexi cap mutual funds नी गुंतवणूकदारांना दीर्घकालीन चांगला परतावा दिला आहे. फ्लेक्सी कॅप श्रेणीतील टॉप ५ फंडांनी गेल्या ५ वर्षांत २५-२८% वार्षिक परतावा दिला आहे. असोसिएशन ऑफ म्युच्युअल फंड्स इन इंडियाच्या आकडेवारीनुसार, फ्लेक्सी कॅप फंडच्या टॉप ५ योजनांमध्ये एचडीएफसी फ्लेक्सी कॅप फंड, क्वांट फ्लेक्सी कॅप फंड, बँक ऑफ इंडिया फ्लेक्सी कॅप फंड, जेएम फ्लेक्सी कॅप फंड आणि फ्रँकलिन इंडिया फ्लेक्सी कॅप फंड यांचा समावेश आहे. या फंडांनी गेल्या ५ वर्षांत २५-२८% परतावा दिला आहे. या फंडांनी गेल्या ५ वर्षात गुंतवणूकदारांच्या संपत्तीत तीन पट वाढ केली आहे.



HDFC फ्लेक्सी कॅप फंडने गेल्या पाच वर्षांत २८.४८% वार्षिक परतावा दिला आहे. एखाद्या गुंतवणूकदाराने पाच वर्षांपूर्वी या योजनेत १ लाख रुपये गुंतवले असते, तर त्याच्या गुंतवणुकीचे मूल्य आज ३.५ लाख रुपये झाले असते.



योजना - ५ वर्षातील परतावा

HDFC Flexi Cap Fund - २८.४८ टक्के

Quant Flexi Cap Fund - २८.३५ टक्के

Bank of India Flexi Cap Fund - २७.११ टक्के

JM Flexicap Fund - २६.५९ टक्के

Franklin India Flexi Cap Fund - २५.३४ टक्के



फ्लेक्सी कॅप फंड म्हणजे काय?

फ्लेक्सी कॅप फंड हा एक प्रकारचा इक्विटी म्युच्युअल फंड आहे. हा फंड कोणत्याही एका मार्केट कॅपपुरता (मोठा, मध्यम किंवा लहान) मर्यादित नसतो. फंड मॅनेजरला बदलत्या बाजारपेठेनुसार पोर्टफोलिओ समायोजित करण्याचे पूर्ण स्वातंत्र्य असते. गुंतवणूकदारांच्या पोर्टफोलिओमध्ये ही श्रेणी समाविष्ट करणे खूप चांगले आहे. कारण त्यात वेगवेगळ्या मार्केट कॅपमध्ये गुंतवणूक करण्याची लवचिकता आहे.