• कॅरेबियन प्रीमियर लीग २०२५ मध्ये वेस्ट इंडिजचा शाय होप विचित्रपद्धतीने हिट विकेट झाला.

• होपने स्वीच हिटचा प्रयत्न करताना स्वत:च्या बॅटने स्टंप्स उडवले.

• त्रिनबॅगो नाईट रायडर्सने हा सामना ६ विकेट्सने जिंकला.

क्रिकेटमध्ये फलंदाजाला ११ वेगवेगळ्या प्रकारे बाद करता येतं. यातील एक प्रकार म्हणजे हिट विकेट, ज्यात फलंदाज स्वत:च्या चुकीने बाद होतो. पण नुकतेच कॅरेबियन प्रीमियर लीग २०२५ मध्ये वेस्ट इंडिजचा शाय होप हिट विकेटही विचित्रपद्धतीने झाला. शनिवारी त्रिनबॅगो नाईट रायडर्स विरुद्ध गयाना ऍमेझॉन वॉरियर्स संघात सामना झाला होता, ज्यात ही घटना घडली. हा सामना त्रिनबॅगोने ६ विकेट्सने जिंकला.

झाले असे की गयाना प्रथम फलंदाजीसाठी उतरला होता. यावेळी होप तिसऱ्या क्रमांकावर फलंदाजी करत होता. यावेळी टेरेन्स हिंड्सने टाकलेल्या १४ व्या षटकाचा शेवटचा चेंडू ऑफ स्टंपच्या बाहेर वाईड जात असताना होप विचित्र स्थितीत गेला आणि त्याने थर्ड मॅनच्या दिशेने स्वीच हिट मारण्याचा प्रयत्न केला.

पण त्याचा अंदाज चुकला आणि त्याचीच बॅट स्टंपवर आदळली. त्यामुळे होपला २९ चेंडूत ३ चौकार आणि १ षटकारासह ३९ धावांवर बाद होऊन माघारी परतावे लागले. त्याची विकेट पाहून अनेकांना आश्चर्य वाटले. त्याच्या विकेटचा व्हिडिओही व्हायरल झाला आहे.