मासे हे आरोग्यासाठी उत्तम मानले जातात. त्यामध्ये प्रथिने, व्हिटॅमिन डी, ओमेगा 3 फॅटी ऍसिड मुबलक प्रमाणात असतात. त्यामुळे हृदय निरोगी राहते, मेंदूची कार्यक्षमता वाढते आणि रोगप्रतिकारशक्ती सुधारते. पण मासे खाण्याचे फायदे मिळवायचे असतील तर त्यासोबत कोणते पदार्थ खाऊ नयेत हे जाणून घेणं तेवढंच महत्त्वाचं आहे. काही अयोग्य पदार्थांसोबत मासे खाल्ल्यास पचन बिघडण्यापासून ते ऍलर्जी, गॅस्ट्रिक त्रास अशा समस्या निर्माण होऊ शकतात. (foods to avoid with fish)

1) दूध किंवा दुग्धजन्य पदार्थ

दुधाबरोबर किंवा दुधापासून बनवलेल्या पदार्थांसोबत मासे खाल्ल्यास पचन बिघडू शकतं. शरीराला वेगवेगळ्या प्रकारची प्रथिने एकत्र पचवताना अडचण येते. परिणामी पोटदुखी, त्वचेवर पुरळ, ऍलर्जी अशा समस्या होऊ शकतात.

2) लिंबूवर्गीय फळं

लिंबू, संत्री, मोसंबी यांसारख्या आंबट चवीच्या फळांबरोबर मासे खाल्ल्यास त्यातील आम्ल (acid) माशांच्या पोतावर आणि चवीवर विपरीत परिणाम करतो. तसेच पचनावरही ताण येतो.

3) अतितळलेले व प्रक्रिया केलेले पदार्थ

तळलेल्या पदार्थांमध्ये ट्रान्स फॅट्स मोठ्या प्रमाणात असतात. हे हृदयासाठी धोकादायक ठरतात. माशांसोबत असे पदार्थ खाल्ल्यास माशातील पौष्टिकता कमी होते आणि शरीरावर अतिरिक्त भार पडतो.

4) बीन्स आणि शेंगा

बीन्स व शेंगांमध्ये रॅफिनोज नावाची जटिल साखर असते, जी पचायला कठीण असते. माशांबरोबर बीन्स खाल्ल्यास गॅस, फुगलेपणा व पोटातील अस्वस्थता वाढते.

5) बटाटे आणि जड पिष्टमय पदार्थ

बटाटे, ब्रेड, पिझ्झा यांसारख्या जड पदार्थांसोबत मासे खाल्ल्यास शरीरात जास्त कॅलरी व कार्बोहायड्रेट्स जमा होतात. यामुळे पचनसंस्था मंदावते आणि वजन वाढण्याची शक्यता असते.

6) मसालेदार पदार्थ

माशांची चव सौम्य असते. त्यामुळे खूप मसालेदार पदार्थांसोबत मासे खाल्ल्यास त्यांची खरी चव दडपली जाते. शिवाय अतिमसालेदार अन्नामुळे गॅस्ट्रिक समस्या, आम्लपित्त आणि सूज होऊ शकते.

मासे पौष्टिक असले तरी चुकीच्या पदार्थांसोबत त्यांचा वापर आरोग्यास हानीकारक ठरतो. त्यामुळे मासे खाताना योग्य संयोजन निवडा. हलक्या भाज्या, साधा भात किंवा सलाड हे पर्याय माशांसोबत उत्तम जुळतात. यामुळे शरीराला आवश्यक पोषण तर मिळेलच पण पचनसंस्थाही निरोगी राहील.