साऊथ आफ्रिका दौऱ्यासाठी महाराष्ट्राचा संघ रवाना
कल्याण-डोंबिवलीतील सात खेळाडूंचा समावेश
कल्याण, ता. २३ (वार्ताहर) : साऊथ आफ्रिका क्रिकेट दौऱ्यासाठी महाराष्ट्राचा संघ नुकताच रवाना झाला असून, या संघात कल्याण-डोंबिवली परिसरातील सात खेळाडूंचा समावेश आहे. कल्याणच्या संतोष स्पोर्ट्स क्रिकेट अकॅडमीचा संघ सलग १७ व्या वर्षी या आंतरराष्ट्रीय दौरा आणि उच्च प्रशिक्षणासाठी जात आहे.

२३ ऑक्टोबर ते ३ नोव्हेंबर या कालावधीत साऊथ आफ्रिकेच्या जॉहान्सबर्ग येथे १४ वर्षांखालील क्रिकेट स्पर्धा होणार आहे. भारतीय संघात एकूण १४ खेळाडूंचा समावेश आहे. या दौऱ्यात महाराष्ट्राचा निवडलेला संघ दोन डे-नाईट आणि सहा टी-२० डे सामने खेळणार आहे. या युवा खेळाडूंना आंतरराष्ट्रीय क्रिकेटपटू मौर्केल बंधू आणि लायन्स टीमचे प्रमुख प्रशिक्षक कर्ट हुमन यांच्यामार्फत उच्च प्रशिक्षणाचे धडे मिळणार आहेत.

साऊथ आफ्रिका (जॉहान्सबर्ग) येथील प्रसिद्ध ईस्टर्न क्रिकेट अकॅडमीने या स्पर्धांचे आयोजन केले आहे. प्रमुख आयोजक संतोष पाठक यांनी सांगितले की, यामुळे भारतीय तरुण क्रिकेटपटूंना नक्कीच फायदा होईल. परेश हिंदुराव हे या संघाचे प्रमुख प्रशिक्षक म्हणून काम पाहणार आहेत. संघातील खेळाडूंमध्ये रुद्र मेढी, साई पाटील, घनामृत पाटील, कृष्णा धामी, यश भुरभूडा, अंश यादव, मुराडे शार्दुल, सात्विक कारेकर, क्षितिज बिरे, राजवीर कुटे, देवांश सोनावणे, नक्श सिंग, सार्विल दिवटे आणि वेदिका कुंभार्डे यांचा समावेश आहे. या सर्व टीमला माजी आमदार संजय दत्त, ब्रिजकिशोर दत्त आणि महाराष्ट्र क्रीडा धोरणाचे सदस्य अविनाश ओंबासे यांनी शुभेच्छा दिल्या.