வங்கக்கடலில் கடந்த 24ம் தேதி உருவான காற்றழுத்த தாழ்வுப் பகுதி, படிப்படியாக வலுவடைந்து தற்போது ‘மோந்தா’ என்ற பெயருடன் புயலாக மாறியுள்ளது. இது மணிக்கு சுமார் 13 கிலோமீட்டர் வேகத்தில் வடகிழக்கு திசையில் நகர்ந்து கொண்டு, சென்னைக்கு தற்போது சுமார் 640 கி.மீ. தொலைவில் மையமாகக் காணப்படுகிறது. இந்த புயல், இவ்வாண்டு வடகிழக்கு பருவமழை காலத்தின் முதல் புயலாகும்.

பசிபிக் உயர் அழுத்தம் காரணமாக புயல் இன்றிரவு முதல் மேற்கு-வடமேற்கு திசையில் நகரத் தொடங்கும். பின்னர், இமயமானில் காணப்படும் மேற்கத்திய தாழ்வு மண்டலம், இதனை தனது திசைக்கு இழுப்பதாகவும் ஆய்வாளர்கள் கூறுகின்றனர். இதன் காரணமாக ‘மோந்தா’ புயல் வடக்கு-வடமேற்கு திசையில் நகர்ந்து, ஆந்திராவின் காக்கிநாடா அருகே மசூலிப்பட்டினம் - கலிங்கப்பட்டினம் இடையே நாளை (செவ்வாய்) மாலை அல்லது இரவு வேளையில் கரையை கடக்க உள்ளது என வானிலை ஆய்வு மையம் தெரிவித்துள்ளது.

புயல் கரையை நெருங்கும் போது வலுவிழக்கும் வாய்ப்பிருந்தாலும், ஆந்திராவின் ஓங்கோல் முதல் நெல்லூர் வரையிலான கடலோரங்களில் குறுகிய நேரத்தில் மிக கனமழை பெய்யலாம் என கணிக்கப்பட்டுள்ளது.

தமிழகத்தின் தெற்கு மற்றும் மத்திய பகுதிகளுக்கு பெரிய தாக்கம் இருக்காது என்றாலும், சென்னை, திருவள்ளூர், காஞ்சீபுரம், செங்கல்பட்டு, ராணிப்பேட்டை போன்ற **வடமாவட்டங்களில் விட்டு விட்டு கன மழையிலும், சில இடங்களில் மிக கனமழையிலும்** பதிவாக வாய்ப்பு உள்ளது. தனியார் வானிலை ஆய்வாளர் ஹேமச்சந்தர் கூறியதன்படி, இன்று காலை 11 மணி முதல் நாளை காலை 11 மணி வரை மழை தீவிரமாக வாய்ப்புள்ளதாக கணிக்கப்பட்டுள்ளது.

தரைக்காற்று வடக்கு-வடமேற்கு திசையில் மணிக்கு 30 முதல் 40 கி.மீ. வேகத்தில் வீசும். மத்திய மேற்கு மற்றும் வடமேற்கு வங்கக்கடலில் நாளை வரை மணிக்கு 80 முதல் 100 கி.மீ. வேகத்தில் சூறாவளி காற்று வீசக்கூடும். மேலும் ஆந்திர கடலோரப்பகுதிகளில் இன்று முதல் புதன்கிழமை காலை வரை மணிக்கு 110 கி.மீ. வரை காற்று வீச வாய்ப்பிருப்பதால் மீனவர்கள் கடலுக்கு செல்ல வேண்டாம் என அறிவுறுத்தப்பட்டுள்ளது.

2020-ம் ஆண்டு நவம்பரில் உருவான ‘நிவர்’ புயல் மாமல்லபுரம் அருகே கரையை கடந்து 6 மணி நேரத்திலேயே கடலூர்-விழுப்புரம் இடையே 33 செ.மீ. வரை மழையை கொட்டியது. அதேபோன்று ‘மோந்தா’ புயலும் குறுகிய நேரத்தில் மிக கனமழை பெய்யும் வாய்ப்புள்ளதாக ஆய்வாளர்கள் எச்சரிக்கின்றனர்.

எனினும், புயல் நகரும் இறுதி நேர திசை மாற்றங்களின் அடிப்படையில் மழை தீவிரம் மாறக்கூடும் என்பதால், மக்கள் வானிலை துறையின் அறிவிப்புகளை பின்பற்றுவது மிக அவசியம் என வானிலை ஆய்வாளர்கள் வலியுறுத்துகின்றனர்.

இதையும் பிடிச்சிருந்தா படிச்சு பாருங்க

புரட்டாசி மாதத்தில் இத்தனை சிறப்புகளா? என்னென்ன வழிபாடுகள், பலன்கள் தெரியுமா?

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்

பளபளக்கும் மிருதுவான சருமத்திற்கு இதை மட்டும் செய்தாலே போதும்!!

உங்க நட்சத்திரத்துக்கு லாபம் தரும் துறை எது?