கடந்த சட்டமன்றத் தேர்தலின்போது நடிகர் விஜய், கருப்பு-சிவப்பு வண்ண சைக்கிளில் வந்து வாக்களித்த சம்பவம், தமிழக அரசியல் அரங்கில் இன்றும் பேசப்பட்டு வருகிறது. இந்நிலையில், சமீபத்தில் நடந்த தமிழக வெற்றி கழகத்தின் (த.வெ.க.) பொதுக்கூட்டத்தில் பேசிய ஆதவ் அர்ஜுன், விஜய்யின் இந்தச் செயல் திராவிட முன்னேற்றக் கழகத்திற்கு (தி.மு.க.) மறைமுகமாக ஆதரவு தெரிவிப்பதற்காகவே செய்யப்பட்டது என்று பகிரங்கமாகத் தெரிவித்தார். மேலும், விஜய்யின் அந்தச் செய்கைக்கு நன்றி தெரிவிக்கும் வகையில் கூட தி.மு.க. நடந்துகொள்ளவில்லை என்றும் அவர் ஆதங்கப்பட்டார். ஆதவ் அர்ஜுன் முன்வைத்த இந்த அதிர்ச்சிகரமான கருத்து, இணையத்தில் புதிய விவாதப் பொருளாக மாறி, பல தரப்பிலிருந்தும் ஆதரவு மற்றும் கண்டனங்களைப் பெற்று வருகிறது.

ஆதவ் அர்ஜுனின் இந்தத் தன்னிச்சையான பேச்சுக்குக் கண்டனம் தெரிவிக்கும் வகையில், பிரபல youtuber U2Brutus , தனது சமூக வலைதளப் பக்கத்தில் கிண்டலான கருத்தைப் பதிவிட்டுள்ளார். அவர், “குருவி பட சம்பளத்திற்கும் இதற்கும் சரியா போச்சு” என்று நையாண்டியாகக் குறிப்பிட்டிருந்தார். இதன் மூலம், விஜய் கொடுத்ததாகக் கூறப்படும் ‘மறைமுக ஆதரவு’ என்பது ஏதோ ஒரு பணப் பரிமாற்றத்திற்காக (குருவி பட சம்பளம்) செய்யப்பட்டிருக்கலாம் என்ற தொனியில் அவர் விமர்சித்திருப்பது தற்போது பேசுபொருளாகி வருகிறது.