பெங்களூரு ஹொசகெரஹள்ளி பகுதியைச் சேர்ந்த 31 வயதுடைய தனியார் வங்கி ஊழியர் ககன் ராவ், தனது மனைவி மேகனாவின் துன்புறுத்தல் காரணமாக ஞாயிற்றுக்கிழமை அன்று தனது வீட்டில் தூக்கிட்டுத் தற்கொலை செய்து கொண்டார்.

ககன் ராவ், சாமராஜநகரைச் சேர்ந்த இறுதி ஆண்டு BCA மாணவியான மேகனாவை 11 மாதங்களுக்கு முன்புதான் திருமணம் செய்திருந்தார்.

கணவர் ககன் ராவ் மீது முறைகேடான உறவில் இருப்பதாக மனைவி மேகனா அடிக்கடி குற்றம் சாட்டி வந்ததாகவும், இதனால் இருவருக்கும் இடையே தொடர்ந்து சண்டைகள் ஏற்பட்டு வந்ததாகவும் போலீசார் தெரிவித்துள்ளனர்.

ஞாயிற்றுக்கிழமை காலை 7.45 மணியளவில் இருவருக்கும் இடையே மீண்டும் சண்டை ஏற்பட்ட நிலையில், ககன் ராவ் அறைக்குச் சென்று சீலிங் ஃபேனில் சேலையைக் கட்டித் தூக்கிட்டுள்ளார். 10 நிமிடங்களுக்கும் மேலாக அவர் வெளியே வராததால், அக்கம் பக்கத்தினர் உதவியுடன் கதவை உடைத்து உள்ளே சென்று பார்த்தபோது, அவர் தூக்கில் தொங்கிக் கொண்டிருந்தது தெரியவந்துள்ளது.

உடனடியாக மருத்துவமனைக்குக் கொண்டு செல்லப்பட்டாலும், அவர் உயிரிழந்ததாக மருத்துவர்கள் தெரிவித்துள்ளனர். இந்தச் சம்பவம் குறித்து ககன் ராவின் குடும்பத்தினர் அளித்த புகாரின் பேரில், மனைவி மேகனா மீது தற்கொலைக்குத் தூண்டியதாக போலீசார் வழக்குப் பதிவு செய்துள்ளனர்.

இதற்கு முன்பும் மேகனா தனது கணவர் மீது பெண்கள் காவல் நிலையத்தில் புகார் அளித்திருந்ததாகவும், சமீபத்தில் சமாதானம் ஆகி வந்த பிறகும் சண்டைகள் தொடர்ந்ததாகவும் போலீஸ் தரப்பு கூறியுள்ளது.