இந்தியாவில் மின்னணு பொருட்கள் உற்பத்தியை ஊக்குவிக்கும் இலக்குடன், மின்னணுவியல் மற்றும் தகவல் தொழில்நுட்ப அமைச்சகம் ரூ.7,172 கோடி மொத்த முதலீட்டில் 17 புதிய திட்டங்களுக்கு ஒப்புதல் அளித்தது. இந்த ஒப்புதல்களின் மூலம், இத்திட்டத்தின் கீழ் இதுவரை அங்கீகரிக்கப்பட்ட மொத்த முதலீட்டின் மதிப்பு ரூ.12,704 கோடியாக உயர்ந்துள்ளது.

மத்திய அரசின் மின்னணு பாகங்கள் உற்பத்தித் திட்டத்தின் கீழ் இந்த 17 திட்டங்களும் அங்கீகரிக்கப்பட்டுள்ளன. இந்த திட்டங்களின் முக்கிய நோக்கங்கள் பின்வருவன:

இந்த திட்டங்கள், நாட்டின் பல்வேறு மாநிலங்கள் மற்றும் யூனியன் பிரதேசங்களில் புதிய உற்பத்தி அலகுகளை அமைக்க வழிவகுக்கும். இதில், கர்நாடகாவில் ஐந்து யூனிட், தமிழ்நாடு மற்றும் மகாராஷ்டிராவில் தலா மூன்று யூனிட் மற்றும் ஜம்மு, உ.பி., மத்திய பிரதேசம், குஜராத், ஆந்திரா, மற்றும் கோவாவில் தலா ஓர் யூனிட் ஆகியவை அடங்கும்.

இந்தத் திட்டங்கள் மூலம் சுமார் 11,088 பேருக்கு வேலைவாய்ப்பு கிடைக்கும் என எதிர்பார்க்கப்படுகிறது. இந்த 17 திட்டங்களின் மூலம் ரூ.65,111 கோடி மதிப்பிலான உற்பத்திக்கு பங்களிக்கப்படும் என எதிர்பார்க்கப்படுகிறது.

மத்திய தகவல் தொழில்நுட்ப அமைச்சகத்தின் அதிகாரி ஒருவர், இந்தத் திட்டத்தின் நோக்கத்தை விளக்கினார். “நாங்கள் முதலில் முடிக்கப்பட்ட பொருளை கொண்டு தொடங்கினோம். நாட்டில் அதன் விற்பனை அளவை பெருக்கி, முதலில் முடிக்கப்பட்ட பொருளை அசெம்பிள் செய்வதில் கவனம் செலுத்தினோம். இது மற்ற பாகங்களின் தேவையை அதிகரிக்கும். இதன் விளைவாகவே, பெரிய உற்பத்தி நிறுவனங்களை நாங்கள் நாட்டுக்குள் கொண்டு வர முடிந்தது.”

இந்த தேவையைப் பூர்த்தி செய்யவே, அடுத்தகட்டமாக, மின்னணு பாகங்களுக்கான ஒரு சுற்றுச்சூழல் அமைப்பை உருவாக்க வேண்டிய தேவை ஏற்பட்டது. இதன் மூலம், மின்னணு உற்பத்தி சுற்றுச்சூழல் அமைப்பின் நீண்ட கால வளர்ச்சிக்கு மிக முக்கியமான பாகங்கள் மீது கவனம் செலுத்தப்பட்டது.

அக்டோபர் 27 அன்று ஏழு திட்டங்களுக்கு ரூ.5,532 கோடி முதலீட்டில் ஒப்புதல் அளிக்கப்பட்டதை தொடர்ந்து, இது இரண்டாவது கட்ட ஒப்புதல் ஆகும். இத்திட்டத்தின் கீழ் மொத்தம் ரூ.1.15 லட்சம் கோடி முதலீடு எதிர்பார்க்கப்படும் நிலையில், இதுவரை 249 திட்டங்களில் 24 திட்டங்களுக்கு ஒப்புதல் அளிக்கப்பட்டுள்ளது.

மத்திய அமைச்சர் அஸ்வினி வைஷ்ணவ் கூறுகையில், ஸ்கில் இந்தியா திட்டத்தின் கீழ், சமூகத்துறை அமைப்புகளுடன் இணைந்து புதிய மின்னணு உற்பத்தித் திறன் கட்டமைப்பை உருவாக்குவதாக குறிப்பிட்டார். இதன்மூலம், டயர் 2, 3 நகரங்களில் இளைஞர்களுக்கு நேரடி வேலைவாய்ப்பு வழங்க, செய்முறை பயிற்சி அளிக்கப்படும் என்றும் அவர் தெரிவித்தார்.

இத்திட்டங்கள் இந்தியாவின் மின்னணு உற்பத்தி துறையின் வளர்ச்சியை விரைவுபடுத்துவதோடு, ‘மேக் இன் இந்தியா’ திட்டத்திற்கும் வலு சேர்க்கும்.

Bala Siva

டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.

Author: Bala Siva