पाटणा, १९ नोव्हेंबर. बिहारमध्ये प्रचंड बहुमतासह पुनरागमन करणाऱ्या राष्ट्रीय लोकशाही आघाडीच्या (एनडीए) सरकार स्थापनेचे चित्र स्पष्ट झाले आहे. याच क्रमाने सीएम नितीश कुमार यांनी बुधवारी दुपारी एनडीएच्या घटक पक्षांच्या नेत्यांसह राजभवन गाठले आणि त्यांनी राज्यपाल आरिफ मोहम्मद खान यांच्याकडे राजीनामा सुपूर्द केला. एनडीएच्या घटक पक्षांच्या नेत्यांनी नितीश कुमार यांना नवीन सरकार स्थापन करण्यासाठी पाठिंब्याचे पत्र राज्यपालांना सादर केले.

एनडीएच्या बैठकीत नितीश यांची विधिमंडळ पक्षनेतेपदी निवड

यापूर्वी विधानसभेत एनडीएच्या बैठकीत नितीश कुमार यांची विधीमंडळ पक्षनेतेपदी निवड करण्यात आली होती. काही तासांपूर्वी भाजप विधिमंडळ पक्षाच्या नेतेपदी निवड झालेल्या सम्राट चौधरी यांनी नितीश यांना एनडीएचा नेता म्हणून निवडण्याचा प्रस्ताव ठेवला, तर जेडीयूचे विजेंद्र यादव यांनी या प्रस्तावाला पाठिंबा दिला. एलजेपीआर विधिमंडळ पक्षाचे नेते राजू तिवारी यांनीही या प्रस्तावाला पाठिंबा दिला. यासोबतच नितीशकुमार हे बिहारचे मुख्यमंत्री होणार हे निश्चित झाले होते.

गांधी मैदानावर गुरुवारी सकाळी 11.30 वाजता शपथविधी

नियोजित वेळापत्रकानुसार, गुरुवारी सकाळी 11.30 वाजता गांधी मैदानावर शपथविधी सोहळा होणार आहे, जिथे नितीश कुमार विक्रमी 10व्यांदा बिहारच्या मुख्यमंत्रीपदाची शपथ घेणार आहेत. पंतप्रधान नरेंद्र मोदी आणि केंद्रातील सत्ताधारी एनडीए सरकारमधील अनेक मंत्री याशिवाय एनडीए शासित राज्यांचे मुख्यमंत्रीही शपथविधी सोहळ्याला उपस्थित राहणार आहेत.