गुंतवणुकदारांना आकर्षित करण्यासाठी कृषी रसायन निर्मिती करणाऱ्या कंपनीने डबल धमाका ऑफर आणली आहे. ही कंपनी म्हणजेच भारती रसायन लिमिटेडने होय. कंपनीने भागधारकांना 'बोनस शेअर' आणि 'स्टॉक स्प्लिट'च्या रूपात दुहेरी भेट जाहीर केली आहे. कंपनीने 1:1 बोनस शेअर आणि 1:2 स्टॉक स्प्लिट (विभाजन) साठी 'रेकॉर्ड डेट' निश्चित केली आहे. या घोषणेनंतर, कंपनीच्या शेअर्सची बाजारात उपलब्धता आणि तरलता वाढण्यास मदत होईल, असे व्यवस्थापनाचे मत आहे. सध्या कंपनीचा शेअर 10,245 रुपयांवर व्यवहार करत आहे.

बोनस आणि स्प्लिट ऑफरस्टॉक स्प्लिट (1:2): भारती रसायन 10 रुपये दर्शनी मूल्याच्या एका शेअरचे विभाजन 5 रुपये दर्शनी मूल्याच्या दोन शेअर्समध्ये करेल. यामुळे शेअर्सची किंमत कमी होईल आणि ते लहान गुंतवणूकदारांसाठी अधिक परवडणारे होतील. भागधारकांच्या एकूण गुंतवणुकीच्या मूल्यात कोणताही बदल होणार नाही.

बोनस शेअर (1:1): स्टॉक स्प्लिट झाल्यानंतर, कंपनी प्रत्येक पूर्ण भरलेल्या शेअरमागे (5 रुपये दर्शनी मूल्याचा) एक मोफत अतिरिक्त बोनस शेअर देईल. कंपनी एकूण 83,10,536 बोनस शेअर्सचे वितरण करणार आहे.

• रेकॉर्ड तारीख : 12 डिसेंबर 2025 पर्यंत ज्यांच्याकडे कंपनीचे शेअर्स असतील, त्यांना या दोन्ही फायद्यांचा लाभ मिळेल.
• बोनस शेअर्सचे वाटप 15 डिसेंबर 2025 रोजी केले जाईल आणि 16 डिसेंबर 2025 पासून त्यांचे ट्रेडिंग सुरू होण्याची अपेक्षा आहे.

कंपनीची आर्थिक स्थितीभारती रसायन 'भारत ग्रुप'चा भाग असून कृषी रसायन उत्पादनासाठी (कीटकनाशके, इंटरमीडिएट्स) ओळखली जाते. कंपनीचे आर्थिक व्यवस्थापन मजबूत आहे, जे केवळ 0.08 च्या कमी कर्ज-ते-इक्विटी गुणोत्तरावरून स्पष्ट होते. कंपनीचा ROCE 14.3% आणि ROE 11.1% आहे.

अलीकडील दुसऱ्या तिमाहीत (Q2 FY26) कंपनीच्या आर्थिक कामगिरीत घट नोंदवली गेली आहे: विक्री: मागील वर्षाच्या 328 कोटी रुपयांवरून 13% घटून 286 कोटी रुपये झाली.

निव्वळ नफा: 35% नी घसरून 26.2 कोटी रुपये झाला.

ईपीएस : 35% नी घसरून 62.96 रुपये झाला.

शेअर बाजारात कंपनीची कामगिरी संमिश्र राहिली आहे. गेल्या पाच वर्षांत 18% परतावा दिला असला तरी, गेल्या वर्षभरात 8% आणि मागील महिन्यात 4% घट झाली आहे.

गुंतवणुकदारांनी काय करावे?बोनस आणि स्टॉक स्प्लिटमुळे भारती रसायनचे शेअर्स बाजारात अधिक आकर्षक बनू शकतात. हे कॉर्पोरेट ॲक्शन कंपनीच्या मजबूत आर्थिक स्थितीवर विश्वास दर्शवतात. मात्र, गुंतवणूकदारांनी कंपनीच्या अलीकडील विक्री आणि नफ्यातील घट विचारात घेणे आवश्यक आहे. कोणताही निर्णय घेण्यापूर्वी स्वतःचे सखोल संशोधन करणे आणि आर्थिक सल्लागाराचा सल्ला घेणे अत्यंत महत्त्वाचे आहे.