தமிழகத்தில் பள்ளி மாணவர்கள் அரசுப் பேருந்துகளில் இலவசமாகப் பயணம் செய்வதற்கான பயண அட்டைகள் வழங்கும் முறையில் பெரும் மாற்றங்கள் கொண்டு வரப்பட்டுள்ளன.

முன்பு விண்ணப்பங்களைச் சரிபார்த்து அச்சிட இரண்டு மாதங்கள் வரை காலதாமதம் ஏற்பட்ட நிலையில், தற்போது பள்ளிக் கல்வித்துறையின் EMIS இணையதளத்தில் உள்ள மாணவர்களின் தகவல்களை நேரடியாகப் பயன்படுத்தி விரைவாக அட்டைகள் வழங்கப்படுகின்றன.

இந்த டிஜிட்டல் முறையினால் நிர்வாகத் தவறுகள் குறைக்கப்பட்டு, மாணவர்கள் விண்ணப்பித்த குறுகிய காலத்திலேயே அட்டைகளைப் பெற வழிவகை செய்யப்பட்டுள்ளது. இந்தச் சிறப்பான ஒருங்கிணைப்பு காரணமாக, பயண அட்டைகள் பெறும் மாணவர்களின் எண்ணிக்கை முன்னெப்போதும் இல்லாத வகையில் அதிகரித்துள்ளது.

கடந்த 2023-24 கல்வியாண்டில் 20 லட்சம் மாணவர்களுக்கு வழங்கப்பட்ட நிலையில், நடப்பு கல்வியாண்டில் சுமார் 60 லட்சம் மாணவர்களுக்குப் பயண அட்டைகள் வழங்கப்பட்டு ஒரு மாபெரும் சாதனை படைக்கப்பட்டுள்ளது.

பொருளாதாரத்தில் பின்தங்கிய மாணவர்கள் உட்பட அனைவரும் எவ்விதத் தடையுமின்றி கல்வி பயில வேண்டும் என்ற நோக்கில், போக்குவரத்து மற்றும் கல்வித் துறைகள் இணைந்து இந்த டிஜிட்டல் திட்டத்தைச் சிறப்பாகச் செயல்படுத்தி வருகின்றன.