இயக்குநர் ஹெச். வினோத் இயக்கத்தில் விஜய் நடித்துள்ள 'ஜனநாயகன்' திரைப்படத்தின் வெளியீடு தணிக்கைச் சிக்கல்களால் ஒத்திவைக்கப்பட்டுள்ளது. பூஜா ஹெக்டே, மமிதா பைஜு, பாபி தியோல் போன்ற முன்னணி நட்சத்திரங்கள் நடித்துள்ள இப்படம் இன்று வெளியாகவிருந்த நிலையில், சென்சார் சான்றிதழ் பெறுவதில் இழுபறி நீடிக்கிறது. இது தொடர்பான வழக்கில் சென்னை உயர் நீதிமன்றம் இன்று காலை 10.30 மணிக்குத் தீர்ப்பளிக்க உள்ளது. தணிக்கை வாரிய உறுப்பினர் ஒருவரின் புகாரால் யு/ஏ (U/A) சான்றிதழ் நிறுத்தி வைக்கப்பட்டுள்ளதாகக் கூறப்படும் நிலையில், நீதிமன்றத் தீர்ப்பே படத்தின் ரிலீஸை முடிவு செய்யும்.

இந்த விவகாரத்தில் அரசியல் ரீதியான மோதல்களும் வலுத்துள்ளன. தமிழக வெற்றிக் கழகத் தொண்டர்கள், விஜய்யின் அரசியல் வளர்ச்சியைத் தடுக்கவே வேண்டுமென்றே படத்திற்கு முட்டுக்கட்டை போடப்படுவதாகக் குற்றம் சாட்டியுள்ளனர். விஜய்க்கு ஆதரவாகத் தமிழக காங்கிரஸ் கமிட்டி குரல் கொடுத்துள்ளதுடன், பிரதமர் மோடி விஜய்யை ஓர் அரசியல்வாதியாக எதிர்கொள்ளத் தயாராக வேண்டும் என்றும் தெரிவித்துள்ளது. பல்வேறு திரைப்பிரபலங்களும் விஜய்க்கு ஆதரவான கருத்துகளைத் தெரிவித்து வருகின்றனர்.

இந்நிலையில், செய்தியாளர்களைச் சந்தித்த பாஜக மூத்த தலைவர் ஹெச். ராஜாவிடம் இத்திரைப்பட விவகாரத்தில் பாஜகவின் தலையீடு குறித்துக் கேள்வி எழுப்பப்பட்டது. அதற்குப் பதிலளித்த அவர், "விஜய்க்கு நெருக்கடி கொடுக்க நினைத்திருந்தால், கடந்த செப்டம்பர் 27-ஆம் தேதியே கொடுத்திருப்போம். ஆனால், பாஜக மனிதாபிமானத்துடன் செயல்பட்டது. நாங்கள் நெருக்கடி கொடுத்திருந்தால் விஜய்யால் இப்போது வெளியேவே வந்திருக்க முடியாது; ஒருவரது பலவீனத்தைக் கையில் எடுத்து நாங்கள் செயல்படுவதில்லை" என்று அதிரடியாகத் தெரிவித்தார்.

ஹெச். ராஜாவின் இந்தக் கருத்து, கடந்த செப்டம்பர் மாதம் கரூரில் விஜய் நடத்திய பிரசாரக் கூட்டத்தில் ஏற்பட்ட நெரிசலில் 41 பேர் உயிரிழந்த துயரச் சம்பவத்தைச் சுட்டிக்காட்டுவதாக அமைந்துள்ளது. கரூர் விபத்து தொடர்பாக விஜய்க்கு சிபிஐ (CBI) சம்மன் அனுப்பியிருக்கும் சூழலில், ஹெச். ராஜாவின் இத்தகைய பேச்சு அரசியல் வட்டாரத்தில் பெரும் விவாதத்தைக் கிளப்பியுள்ளது. விஜய்யின் அரசியல் வருகை பாஜக உள்ளிட்ட கட்சிகளுக்குத் தேர்தல் களத்தில் நெருக்கடியை ஏற்படுத்தும் என்பதாலேயே இத்தகைய விமர்சனங்கள் முன்வைக்கப்படுவதாகத் தெரிகிறது.

அரசியல் நோக்கர்களின் கருத்தின்படி, அதிமுக - பாஜக கூட்டணி உறுதியாகியுள்ள நிலையில், தேமுதிக, டிடிவி தினகரன் மற்றும் ஓபிஎஸ் ஆகியோர் என்.டி.ஏ (NDA) கூட்டணியில் இணைவதில் இன்னும் தாமதம் காட்டி வருகின்றனர். இதற்குப் பின்னணியில் விஜய் ஃபேக்டர் (Vijay Factor) இருக்கலாம் எனக் கருதப்படுகிறது. விஜய்யை தங்கள் பக்கம் இழுக்க அல்லது அவரை முடக்க இத்தகைய மறைமுக அரசியல் அழுத்தங்கள் கொடுக்கப்படுவதாகப் பார்வையாளர்கள் கருதுகின்றனர். நீதிமன்றத் தீர்ப்பும், சிபிஐ விசாரணையும் விஜய்யின் அரசியல் மற்றும் சினிமா பயணத்தில் முக்கியத் திருப்புமுனையாக அமையும் என எதிர்பார்க்கப்படுகிறது.