தமிழக அரசியல் களம் தற்போது ‘கூட்டணி’ கணக்குகளால் அதிரத் தொடங்கியுள்ளது. மதுரையில் செய்தியாளர்களைச் சந்தித்த புதிய தமிழகம் கட்சித் தலைவர் டாக்டர் கிருஷ்ணசாமி, திமுக அரசு மக்கள் கொடுத்த வாக்குறுதிகளை நிறைவேற்றாமல் அனைத்து மட்டங்களிலும் தோல்வியடைந்துவிட்டதாகக் கடுமையாக விமர்சித்தார். தற்போதைய சூழலில் அதிமுக மற்றும் திமுக ஆகிய இரண்டு பெரிய கட்சிகளுமே வலிமை இழந்துவிட்டதாகக் குறிப்பிட்ட அவர், நடிகர் விஜய்யின் தமிழக வெற்றிக் கழகத்தை (தவெக) அந்த இரண்டு கட்சிகளுக்கும் சமமான ஒரு சக்தியாகவே பார்ப்பதாகக் கூறி பரபரப்பைக் கிளப்பினார்.
மேலும், தவெகவின் முக்கிய நிர்வாகிகள் தன்னுடன் கூட்டணி குறித்துப் பேசியுள்ளதாகத் தெரிவித்த கிருஷ்ணசாமி, விஜய்யின் ‘ஆட்சியில் பங்கு’ என்ற கருத்தில் அவர் எவ்வளவு உறுதியாக இருக்கிறார் என்பதைப் பொறுத்திருந்தே பார்க்க வேண்டும் என்றார். அதிமுகவும் தங்களுடன் பேச்சுவார்த்தை நடத்தி வருவதால், யாருடன் கூட்டணி என்பதை இன்னும் சில நாட்களில் முறையாக அறிவிக்கப் போவதாக அவர் கூறினார். பணபலம் இல்லாத நேர்மையான தேர்தல் நடக்க வேண்டும் என்பதே தனது விருப்பம் என்றும் அவர் அந்தச் சந்திப்பில் வலியுறுத்தினார்.
