திரையுலகில் பல தசாப்தங்களாகத் தனது கடின உழைப்பால் சம்பாதித்த பெயர், புகழ் மற்றும் அடையாளங்களை யாரும் தவறாகப் பயன்படுத்தக் கூடாது என்பதில் நடிகர் கமல்ஹாசன் உறுதியாக உள்ளார். குறிப்பாக, தனது அனுமதி இல்லாமல் தனது பெயர், புகைப்படம், குரல் மற்றும் ரசிகர்களால் அன்போடு அழைக்கப்படும் ‘உலகநாயகன்’ என்ற பட்டம் ஆகியவற்றை வணிக ரீதியாகப் பயன்படுத்தத் தடை விதிக்கக் கோரி சென்னை உயர்நீதிமன்றத்தில் அவர் வழக்கு தொடர்ந்துள்ளார்.

சென்னையைச் சேர்ந்த ‘நீயே விடை’ என்ற நிறுவனம், அவரது ஒப்புதல் இன்றி அவரது படம் மற்றும் வசனங்கள் அச்சிடப்பட்ட டி-ஷர்ட்களை விற்பனை செய்வதைச் சுட்டிக்காட்டியுள்ள அவர், இதுபோன்ற செயல்கள் தன்னை ஒரு ‘வியாபாரப் பொருளாக’ மாற்றுவதாகவும், இது தனது நற்பெயருக்குப் பாதிப்பை ஏற்படுத்துவதாகவும் மனுவில் குறிப்பிட்டுள்ளார். இந்த வழக்கு ஒரு குறிப்பிட்ட நிறுவனத்திற்கு எதிரானது மட்டுமல்லாமல், எதிர்காலத்தில் யார் ஒருவரும் தனது அடையாளத்தை வணிக லாபத்திற்காகப் பயன்படுத்துவதைத் தடுக்கும் வகையில் ஒரு பொதுவான தடையுத்தரவாக இருக்க வேண்டும் என கமல்ஹாசன் கோரியுள்ளார்.

ஏ.ஐ (AI) போன்ற நவீன தொழில்நுட்பங்கள் வளர்ந்து வரும் சூழலில், பிரபலங்களின் குரலும் உருவமும் தவறாகப் பயன்படுத்தப்படுவதைத் தடுக்க இத்தகைய சட்ட நடவடிக்கை அவசியம் என அவரது ஆதரவாளர்கள் கருதுகின்றனர். ஏற்கனவே பாலிவுட்டில் அமிதாப் பச்சன், ஐஸ்வர்யா ராய் போன்றோர் தங்களது ‘ஆளுமை உரிமைகளைப்’ (Personality Rights) பாதுகாக்க இது போன்ற உத்தரவுகளைப் பெற்றுள்ள நிலையில், கமல்ஹாசன் தொடர்ந்துள்ள இந்த வழக்கு இன்று விசாரணைக்கு வரவுள்ளது.