Panvel station incident with national record holder athlete: क्रिकेटपटू सोडले तर भारताच्या इतर खेळाडूंना बऱ्याच अडचणींचा सामना करावा लागतो, हे पुन्हा एकदा अधोरेखित झाले आहे. देशातील अव्वल पोल व्हॉल्टर्स ( बांबू उडीपटू) देव मीना आणि कुलदीप यादव यांना पनवेल रेल्वे स्थानकावर रेल्वेतून बाहेर उतरवण्यात आले आणि त्यांना जवळपास ५ तास स्थानकावरच तात्कळत उभं रहावं लागले. या घटनेमुळे सोशल मीडियावर मोठ्या प्रमाणात संताप व्यक्त होत आहे. तिकीट तपासनीसाने दोन्ही खेळाडूंना सांगितले की, त्यांना त्यांचे पोल रेल्वेतून घेऊन जाण्याची परवानगी नाही आणि म्हणून त्यांनी त्यांना उतरवले.

मीना आणि यादव यांनी सोशल मीडियावर एक व्हिडिओ शेअर केला. त्यांनी लिहिले की, ते सुमारे पाच तास पनवेल स्टेशनवर अडकले होते, अधिकाऱ्यांना पटवून देण्याचा प्रयत्न करत होते की त्यांच्या खेळासाठी बांबू आवश्यक आहेत, परंतु रेल्वे अधिकाऱ्यांनी ऐकण्यास नकार दिला.