शुक्रवारी (६ फेब्रुवारी) १९ वर्षांखालील वर्ल्ड कप २०२६ स्पर्धेचा अंतिम सामना हरारेमध्ये भारत आणि इंग्लंड संघात खेळला जात आहे. या सामन्यात भारतीय संघाने इंग्लंडसमोर ४१२ धावांचे भलेमोठे लक्ष्य ठेवले आहे. भारतासाठी वैभव सूर्यवंशीने विश्वविक्रमी शतकी खेळी केली आहे.

आता या सामन्यात विजय मिळवून वर्ल्ड कप जिंकायचा असेल, तर इंग्लंडला ४११ धावा करण्यापासून थांबवण्याचे आव्हान भारतासमोर आहे, तर इंग्लंडला हा सामना जिंकायचा असेल, तर इतिहास घडवावा लागणार आहे. कारण अद्याप इतके मोठ्या लक्ष्याचा पाठलाग या स्पर्धेच्या इतिहासात झालेला नाही.

भारताने नाणेफेक जिंकून प्रथम फलंदाजी करण्याचा निर्णय घेतला होता. भारताकडून सलामीला ऍरॉन जॉर्ज आणि वैभव सूर्यवंशी उतरले होते. पण चौथ्याच षटकात जॉर्जला ९ धावांवर ऍलेक्स ग्रीनने बेन मायेसच्या हातून झेलबाद केले. पण नंतर वैभवला कर्णधार आयुष म्हात्रेची भक्कम साथ मिळाली. त्यांनी शतकी भागीदारीही केली.

या दरम्यान दोघांनी अर्धशतके पूर्ण केली. तसेच आक्रमक खेळताना वैभव शतकाजवळ पोहचला होता. मात्र अर्धशतकानंतर आयुष १९ व्या षटकात बाद झाला. त्याला ऍलेक्स ग्रीननेच बेन मायेसच्या हातून झेलबाद केले. आयुषने ५१ चेंडूत ७ चौकार आणि २ षटकारांसह ५३ धावा केल्या. वैभव आणि आयुष यांनी दुसऱ्या विकेटसाठी १४२ धावांची भागीदारी केली.