Nilesh Sable Social Media Post: महाराष्ट्रातल्या (Maharashtra) प्रेक्षकांना खळखळून हसवणारा कार्यक्रम म्हणजे, 'चला हवा येऊ द्या' (Chala Hawa Yeu Dya). तब्बल 10 वर्ष प्रेक्षकांचं मनोरंजन केल्यानंतर 2024 मध्ये या कार्यक्रमानं निरोप घेतला. त्यानंतर या मराठमोळ्या कार्यक्रमाचं (Marathi Show) नवं पर्व, 26 जुलैपासून झी मराठीवर (Zee Marathi) सुरू झालं पण, नव्या बदलांसह... 'चला हवा येऊ द्या'ची संपूर्ण टीम या नव्या पर्वात दिसली नाही. महत्त्वाची बाब म्हणजे, निलेश साबळे आणि भाऊ कदम ही प्रेक्षकांची दोन लाडकी व्यक्तीमत्त्व नव्या पर्वात नाहीत. नव्या पर्वाची घोषणा होताच, हे दोघे का नाहीत? यावरुन बराच गदारोळ झालेला. त्यावेळी आम्ही वेगळ्या कामांमध्ये बिझी आहोत, असं उत्तर दोघांकडूनही देण्यात आसेलं. त्यावेळी अनेक प्रश्न उपस्थित करण्यात आलेले. त्यानंतर मधल्या काळात निलेश साबळेनं भाऊ कदमसोबत एक शो सुरु केलेला, मात्र तो शोही बंद पडला. अशातच आता निलेश साबळेनं त्याच्या सोशल मीडिया अकाउंटवर केलेल्या पोस्टमुळे चर्चांना उधाण आलं आहे.
'चला हवा येऊ द्या'च्या यंदाच्या पर्वात शोचा कर्ताधर्ता आणि पहिल्यापासून या कार्यक्रमाची घडी ज्यानं बसवली, तो डॉ. निलेश साबळे (Dr. Nilesh Sabale) नव्या पर्वात दिसणार नसल्यामुळे प्रेक्षकांचा हिरमोड झालेला, पण आता निलेशनं त्याच्या सोशल मीडिया अकाउंटवर केलेल्या पोस्टची चर्चा रंगली आहे. या पोस्टमुळे चाहत्यांच्या अपेक्षा उंचावल्या आहेत. तसेच, उत्सुकताही वाढली आहे.
View this post on Instagram
डॉ. निलेश साबळेनं सोशल मीडियावर एक फोटो शेअर केला आहे. यामध्ये तो सूट घालून खुर्चीवर बसला आहे. डोळ्यावर चष्मा आहे. काहीसा गंभीर आणि जबाबदार वाटणारा निलेश साबळेचा लूक आहे. हा फोटो शेअर करत निलेश साबळेनं कॅप्शन लिहिलंय की, "नवा दिवस… नवा विचार… चला… काहीतरी नवीन करूया…!!!"
दरम्यान, निलेश साबळे आता नवं काय करणार, याची उत्सुकचा सर्वांना लागली आहे. त्याच्या पोस्टवर चाहत्यांकडून कमेंट्सचा वर्षाव होत आहे. अनेकजण नव्या कार्यक्रमासाठी त्याला शुभेच्छा देत आहेत. तर, अनेकजण नव्या कार्यक्रमात नव्या कलाकारांना संधी देण्याचं निलेश साबळेला सुचवत आहेत. अशातच आता निलेश साबळेची ही पोस्ट नेमकी काय? खरंच निलेश साबळे नवा कार्यक्रम घेऊन येणार आहे का? याकडे सर्वांचं लक्ष लागलं आहे.
