टीव्हीवर सध्या लाफ्टर शेफ्स अनलिमिटेड एंटरटेनमेंट या शोची जोरदार चर्चा आहे. कुकिंग आणि कॉमेडीचा भन्नाट संगम असलेल्या या शोने प्रेक्षकांची मनं जिंकली आहेत. अली गोनी, करण कुंद्रा आणि अंकिता लोखंडे यांसारख्या लोकप्रिय कलाकारांच्या उपस्थितीमुळे शोला आणखी रंग चढला आहे. प्रत्येक आठवड्यात वेगवेगळ्या सेलिब्रिटींना आमंत्रित करून निर्माते प्रेक्षकांसाठी नवे सरप्राईज देत असतात.

28 फेब्रुवारीच्या एपिसोडमध्ये मात्र काहीतरी खास घडले. 90 च्या दशकातील गाजलेली अभिनेत्री ममता कुलकर्णी जवळपास 25 वर्षांनंतर कॅमेऱ्यासमोर दिसली. सेटवर तिला पाहताच पापाराझी आणि चाहत्यांमध्ये उत्साहाचे वातावरण निर्माण झाले. इतक्या मोठ्या ब्रेकनंतर एखाद्या रिअॅलिटी शोमध्ये तिची उपस्थिती ही प्रेक्षकांसाठी एक धक्का होता.

ममताने सेटबाहेर माध्यमांशी संवाद साधताना आपल्या भावना व्यक्त केल्या. वृत्तांनुसार, ती या नव्या इनिंगबद्दल अत्यंत उत्साही आहे. आजच्या धावपळीच्या आणि तणावपूर्ण आयुष्यात लोकांना हसण्याची गरज असल्याचे तिने सांगितले. हसणं आणि हसवणं याहून चांगलं काय असू शकतं? असे म्हणत तिने शोचे कौतुक केले. ती स्वतःही हा शो पाहत असल्याचे तिने सांगितले.

शोचा तिसरा सीझनही सुपरहिट

या कार्यक्रमात होस्ट म्हणून भारती सिंहची धमाल शैली आणि जज म्हणून हरपाल सिंह सोखीची खास टिप्पणी यामुळे तिसरा सीझनही प्रचंड लोकप्रिय ठरत आहे. कुकिंग टास्कदरम्यान होणारी मस्ती, स्पर्धकांमधील हलकाफुलका विनोद आणि चविष्ट पदार्थांची रेलचेल यामुळे प्रेक्षकांना दर आठवड्याला नवा आनंद मिळतो.

ममता कुलकर्णी 90 च्या दशकात करण अर्जुन आणि सबसे बड़ा खिलाड़ी यांसारख्या सुपरहिट चित्रपटांमधून आपली वेगळी ओळख निर्माण केली आहे. मात्र यशाच्या शिखरावर असतानाच ती अचानक चित्रपटसृष्टीतून दूर गेली. गेल्या काही वर्षांत तिने अध्यात्माची वाट निवडली आणि ग्लॅमरपासून दूर शांत जीवन जगण्याचा निर्णय घेतला.

दरम्यान, तिला ‘किन्नर अखाडा’च्या महामंडलेश्वर पदवीवरूनही काही काळ वादांना सामोरे जावे लागले होते. बराच काळ भारताबाहेर वास्तव्य केल्यानंतर आता तिची ही टीव्हीवरील पुनरागमनाची एन्ट्री चर्चेचा विषय ठरली आहे. 25 वर्षांनंतर छोट्या पडद्यावर परतलेल्या ममता कुलकर्णी कुकिंग आणि कॉमेडीच्या या मंचावर काय नवा रंग भरते याकडे सर्वांचे लक्ष लागले आहे.