बारामती : बारामतीतील तांदुळवाडी येथे तरुणावर कोयत्याने वार करून सोन्या-चांदीचे दागिने व रोख रक्कम लुटल्याप्रकरणी तिघांना अटक करण्यात आली आहे. 26 फेब्रुवारीला रात्री तांदुळवाडी विमानतळ रोडलगत असलेल्या एलसी कंपनी लेक येथील मोकळ्या जागेत फिर्यादी हे त्यांच्या मैत्रिणीसोबत बसले होते. त्यावेळी तोंडाला मास्क व रुमाल बांधलेल्या तिघा इसमांनी त्यांच्या जवळ येत लोखंडी सत्तूर, कोयत्याचा धाक दाखवून पैशांची मागणी केली. विरोध केल्यावर एका आरोपीने फिर्यादीच्या डाव्या पायावर वार करून जखमी केले. (Baramati Crime News)

त्यानंतर आरोपींनी सोन्याची सुमारे 21 ग्रॅम वजनाची चैन, चांदीची अंगठी, चांदीची चैन, आणखी एक चांदीची अंगठी व 2 हजार रुपये रोख असा एकूण 3 लाख 24 हजार रुपयांचा मुद्देमाल जबरदस्तीने काढून घेतला व 'परत इकडे यायचं नाही' अशी धमकी देत तेथून पसार झाले. याप्रकरणी बारामती तालुका पोलीस ठाण्यात गुन्हा दाखल करण्यात आला आहे. प्रसाद गणपत भोसले, धैर्यशील प्रशांत आगवणे व कृष्णा नाना गाडेकर यांना 28 फेब्रुवारी रोजी अटक करण्यात आली. न्यायालयाने त्यांना चार दिवसांची पोलीस कोठडी सुनावली आहे. पोलीस कोठडीत चौकशीदरम्यान आरोपींकडून सोन्या-चांदीचे दागिने व रोख रक्कम असा एकूण 3 लाख 24 हजार रुपयांचा मुद्देमाल जप्त करण्यात आला.

घटनेनंतर जखमी तरुणाला तात्काळ बारामती येथील खासगी रुग्णालयात उपचारासाठी दाखल करण्यात आले. दरम्यान, या घटनेमुळे तांदुळवाडी व विमानतळ रोड परिसरात भीतीचे वातावरण निर्माण झाले होते. बारामती तालुका पोलिसांनी गुन्ह्याच्या तपासासाठी सीसीटीव्ही फुटेज, तांत्रिक विश्लेषण व स्थानिकांच्या मदतीने आरोपींचा माग काढला. पुढील तपासात या आरोपींनी यापूर्वी अशाच प्रकारचे गुन्हे केले आहेत का, याचाही तपास सुरू असून पोलिसांकडून अधिक माहिती गोळा केली जात आहे.