Sonu Sood on Rajpal Yadav: बॉलिवूड अभिनेता राजपाल यादव आणि सोनू सूद यांच्यातील अलीकडील वक्तव्यांमुळे इंडस्ट्रीत नव्या चर्चांना उधाण आलं आहे. चेक बाऊन्स प्रकरणात 5 फेब्रुवारी रोजी पोलिसांसमोर शरणागती पत्करल्यानंतर अनेक कलाकारांनी राजपाल यादवला मदतीचा हात दिला. सोनू सूद यांनी राजपाल यादवच्या समर्थनार्थ खुलं वक्तव्य केलं होतं.मात्र तुरुंगातून बाहेर आल्यानंतर राजपालच्या एका विधानामुळे वादाला वेगळंच वळण मिळालं. राजपाल सोनू सूदवर भडकल्याचं दिसलं. त्यानं मला काम मागण्याची गरज नसल्याचं म्हणत सोनू सूदला फटकारल्याचं दिसलं. आता सोनू सुदनेही राजपाल यादवच्या या वक्तव्यावर आपली बाजू मांडलीय. (Sonu Sood)
जेलमधून सुटल्यानंतर दिलेल्या एका मुलाखतीत राजपाल यादव म्हणाले, “कृपया हा गैरसमज दूर करा की मला काम मागण्याची गरज आहे. काम मागण्यात लाज नाही, पण मी माझ्या कामामुळे जिवंत आहे. सिनेमा माझा पॅशन आहे. मी इतकं काम करतो की मला चारपट काम मिळतं. सुट्टीतही मी काम करतो. मला काम मिळत नाही असं नाही, तर गेली 11 वर्षे काम माझ्यासोबत आहे.” त्यांच्या या विधानाचा संबंध सोनू सूद यांच्या त्या ट्वीटशी जोडला गेला, ज्यात त्यांनी निर्माते-दिग्दर्शकांना राजपाल यांना साइन करून अॅडव्हान्स देण्याचं आवाहन केलं होतं.
राजपाल यांच्या वक्तव्यानंतर सोनू सूद यानीही प्रतिक्रिया दिली. त्यांनी स्पष्ट केलं, “मी त्यांच्या यशासाठी आनंदी आहे. मी कधीच असं म्हटलं नव्हतं की त्यांना कामाची गरज आहे. मी फक्त इतकंच म्हटलं होतं की ते पात्र आहेत, त्यामुळे त्यांना साइन करा आणि अॅडव्हान्स द्या.”
सोनू यांनी सांगितलं की त्याचा उद्देश कुणाची प्रतिमा कमी करण्याचा नव्हता, तर एका प्रतिभावान कलाकारासाठी इंडस्ट्रीचा पाठिंबा मिळवून देण्याचा होता. यापूर्वीही त्यानी सोशल मीडियावर राजपाल यांना “इंडस्ट्रीचा गिफ्टेड अभिनेता” असं म्हणत समर्थन दिलं होतं. त्यांनी असंही जाहीर केलं होतं की आपल्या चित्रपटात ते राजपाल यांना संधी देतील. दोन्ही कलाकारांच्या स्पष्टीकरणानंतरही हा विषय चर्चेत आहे. मात्र सोनू सूदच्या प्रतिक्रियेतून त्याचा हेतू केवळ पाठिंबा देण्याचा होता, हे स्पष्ट होत आहे.
